ខេត្តព្រៃវែង ៖ ស្ត្រីម្នាក់ត្រូវបានបុរសជាប្ដីកាប់ជាច្រើនកាំបិតផ្គាក់ បណ្ដាលឲ្យរងរបួសធ្ងន់ ត្រូវក្រុមគ្រូពេទ្យនៅអ្នកលឿងដេរអស់៤០ថ្នេរ ហើយបញ្ជូនទៅសង្គ្រោះបន្តនៅឯរាជធានីភ្នំពេញ ដែលអំពើហិង្សានេះត្រូវបានគេអះអាងថា កើតឡើងដោយសារតែភ្លើងប្រចណ្ឌ។
ករណីខាងលើនេះ បានកើតឡើងកាលពីវេលាម៉ោង០០ និង ២០នាទីយប់ ថ្ងៃទី២៣ឈានចូលព្រឹកថ្ងៃទី២៤ ខែ មេសា នៅក្នុងភូមិអ្នកលឿង ឃុំអ្នកលឿងស្រុកពាមរក៍ ខេត្តព្រៃវែង។
ស្ត្រីរងគ្រោះមានឈ្មោះជិន សាគារ អាយុ៣៥ឆ្នាំ ត្រូវបុរសជាជនសង្ស័យជាប្ដី កាប់ត្រូវចំនួន៩កាំបិតផ្គាក់បណ្ដាលឲ្យ រងរបួសធ្ងន់ធ្ងរត្រូវបានក្រុមគ្រូពេទ្យបញ្ជូនទៅសង្គ្រោះបន្តនៅរាជធានីភ្នំពេញភ្លាមៗ។ ដោយឡែកបុរសជាប្ដីមានឈ្មោះ ហម អូន អាយុ៤៦ ឆ្នាំត្រូវបានចាប់ឃាត់ខ្លួននៅព្រឹកថ្ងៃបន្ទាប់។
យោងតាមការរៀបរាប់ពីសាក្សីនៅក្បែរផ្ទះជនរងគ្រោះបានឲ្យដឹងថា ស្ត្រីរងគ្រោះធ្លាប់មានប្ដីមុននឹងមានកូនម្នាក់រួចមកហើយ ប៉ុន្តែដោយសារប្ដីមុនរត់ចោលនាងបាត់ នាងក៏សម្រេចចិត្តយកប្ដីក្រោយទៀត ដែលប្ដីក្រោយនេះ ត្រូវជាបងបង្កើតរបស់ប្ដីមុន ហើយក៏រួមរស់ជាមួយគ្នារហូតបានកូនមួយ។
ប្រភពដដែលនេះបានបញ្ជាក់ថា ប៉ុន្មានថ្ងៃមុនកើតហេតុនេះ ប្ដីដើមរបស់នារីរងគ្រោះបានត្រឡប់មកវិញ ហើយបានចេញចូលទៅលេងកូនញឹកញាប់ ទំនងធ្វើឲ្យបង ប្រុសដែលជាប្ដីក្រោយខឹងប្រចណ្ឌ័ ទើបនៅយប់កើត ហេតុ ពេលដែលស្ត្រីរងគ្រោះកំពុងដេកក្នុងមុងជាមួយម្ដាយក្មេក ក៏ស្រាប់តែត្រូវប្ដីទាញកាំបិតផ្គាក់ ចូលទៅកាប់សន្ធាប់ជាច្រើនកាំបិត បណ្ដាលឱ្យនាងរងរបួសសុះសាច់ ទើបបុរសជាប្ដីរត់ចេញទៅវិញបាត់។
ក្រោយការហេតុភ្លាមៗ ក៏មានការផ្អើលឆោឡោឡើង ហើយនារីរងគ្រោះក៏ត្រូវបានសាច់ញាតិនាំយកទៅសង្គ្រោះនៅមន្ទីរពេទ្យបង្អែកអ្នកលឿង ត្រូវក្រុមគ្រូពេទ្យដេរមុខរបួសជិត ៤០ថ្នេរ រួចក៏បញ្ជូនបន្តទៅសង្គ្រោះនៅរាជធានីភ្នំពេញភ្លាមៗ ។ ចំណែកជនបង្កដែលជាប្ដីត្រូវបានកម្លាំងកងរាជអាវុធហត្ថចាប់ឃាត់ខ្លួនបាននៅវេលាម៉ោង៧និង១០នាទីព្រឹកថ្ងៃបន្ទាប់ នៅចំណុចអតីតកំពង់ចម្លងអ្នកលឿង រួចកសាងសំណុំរឿងចាត់ការទៅតាមនីតិវិធី ៕
