ខេត្តកែប៖ លោក ថឹង បូរិន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកែប បានឱ្យដឹងថា ក្នុងរយៈពេល៤ខែដើមឆ្នាំ២០២៥ មន្រ្តីជំនាញរដ្ឋបាលជលផល បានចុះបង្រ្កាបបទល្មើសនេសាទចំនួន ១១ករណី និងបានឃាត់ខ្លួនជនល្មើស ១០នាក់ បញ្ជូនទៅសាលាដំបូងខេត្ត ដើម្បីអនុវត្តតាមនីតិវិធីច្បាប់ផងដែរ។
លោកប្រធានមន្ទីរកសិកម្មរូបនេះ បានឱ្យដឹងទៀតថា ខេត្តកែបក្រោមការដឹកនាំរបស់លោក សោម ពិសិដ្ឋ
ចាប់ពីខែមករា ឆ្នាំ២០២៥ រហូតមកដល់ពេលនេះ កម្លាំងខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តកែប បានអនុវត្តវិធានការបង្ការ ទប់ស្កាត់ និងបង្ក្រាប បទល្មើសជលផលក្នុងដែននេសាទសមុទ្រខេត្តកែប សរុបបាន១១ករណី ដោយបានរិបអូសទូកនេសាទល្មើសចំនួន៣គ្រឿង រួមជាមួយឧបករណ៍ឆក់៦គ្រឿង និងខ្សែភ្លើងមួយចំនួនត្រូវបានដកហូត ខណៈដែលអ្នកប្រព្រឹត្តបទល្មើស ១០នាក់ មាន៥នាក់ជាជនជាតិខ្មែរ និង៥នាក់ទៀតជាជនជាតិបរទេស ត្រូវបានបញ្ជូនទៅសាលាតំបូងខេត្តកែបដើម្បីអនុវត្តតាមនិតិវិធីច្បាប់។
ជាក់ស្ដែងកម្លាំងសមត្ថកិច្ចជំនាញ នៅក្នុងការចុះបង្ក្រាបបទល្មើសចំនួន ១១ករណីនោះ ក៏បានពិន័យអន្តរការណ៍ចំនួន០២ករណី បានអនុវត្តវិធានការអប់រំណែនាំបានចំនួន០៦ករណី ធ្វើកិច្ចសន្យាដល់អ្នកនេសាទសរុបចំនួន ០៦នាក់ ដកហូតឧបករណ៍ឆក់សរុបចំនួន០៦គ្រឿង អួនអូសមានភ្ជាប់ខ្សែភ្លើងចំនួន០៦ចូរ។
ប្រធានមន្ទីររូបនេះ បានគូសបញ្ជាក់ថា ក្នុងការបង្រ្កាបបទល្មើសជលផលនេះ មិនមានការលើកលែងនោះទេ ទោះជនជាតិណាក៏ដោយ ឱ្យតែនេសាទដោយល្មើសច្បាប់ ក្នុងដែនសមុទ្ររបស់ខេត្តកែប៕ដោយ៖តារា
រូបភាព៖BTV
