ភ្នំពេញ៖ បង្គោលភ្លើង២ដើមបានឆ្លងចរន្តភ្លើងផ្ទុះឆេះជាបន្តបន្ទាប់ផ្អើលពលរដ្ឋនិងសមត្ថកិច្ចជួយពន្លត់និងហៅរថយន្តពន្លត់អគ្គិភ័យជួយបាញ់ទឹកពន្លត់ភ្លើង។
ហេតុការណ៍នេះបង្កឲ្យមានការភ្ញាក់ផ្អើលឡើងកាលពីយប់ថ្ងៃទី ៣០ ខែមេសា ឆ្នាំ២០២៥ នៅតាមបណ្តោយផ្លូវកែវ ចិន្តា ដែលស្ថិតក្នុងសង្កាត់ជ្រោយចង្វា ខណ្ឌជ្រោយចង្វា។
ប្រភពព័ត៌មានពីប្រជាពលរដ្ឋដែលរស់នៅក្បែរទីតាំងកើតហេតុបានឲ្យដឹងថា មុនពេលកើតហេតុគាត់បានឮសំឡេងផ្ទុះ ០២ទៅ០៣ដងជាប់គ្នា និងមានក្លិនឈ្ងៀម ហើយដាច់ចរន្តអគ្គិសនី ភ្លាមៗនោះក៏កើតទៅជាអណ្តាតភ្លើងឆាបឆេះយ៉ាងសន្ធោសន្ធៅតែម្តង។ ស្របពេលនោះ ពលរដ្ឋបានប្រញាប់រាយការណ៍ជូនសមត្ថកិច្ចអោយជួយធ្វើអន្តរាគមន៍។
ពលរដ្ឋបានបន្តថា លុះពេលរាយការណ៍ជូនសមត្ថកិច្ចរួច ក៏ឮសំឡេងផ្ទុះម្តងទៀត ហើយមានការស្រែកឆោឡោថា « ឆេះមួយកន្លែងទៀតហើយ »។ ដោយខណៈនោះ រថយន្តពន្លត់អគ្គិភ័យបានមកដល់ រួចបាញ់ទឹកពន្លត់រលត់ភ្លើងជា
ស្ថាពរ។
អគ្គិភ័យនេះដែរបានប្រើប្រាស់រថយន្តពន្លត់ភ្លើងចំនួន០៣គ្រឿង មានរថយន្តរបស់ស្នងការដ្ឋានរាជធានី ០១គ្រឿង , រថយន្តរបស់ទីក្រុងអូសុីអាយសុី និង រថយន្តរបស់សាលាខណ្ឌជ្រោយចង្វា។
គ្រោះអគ្គិភ័យនេះដែរមិនបង្កឲ្យឆេះរាលដាលដល់ផ្ទះប្រជាពលរដ្ឋនោះទេ៕
ដោយ៖ ជ្រោយពេជ្រ
