ខេត្តកំពង់ចាម៖ បុរសម្នាក់បាន ស្លាប់បាត់បង់ជីវិតយ៉ាងអាណោចអាធ័មដោយសារ ធ្លាក់ពីលើដើមឫស្សីមកដីជុងនឹងកាំបិតផ្គាក់របស់ខ្លួន ត្រូវចំដើមទ្រូងខាងស្តាំធ្លាយ មួយផ្លែកាំបិត ។
ហេតុការណ៍នេះបានកើតឡើងកាលពីវេលាម៉ោង៤និង៣០នាទីល្ងាច ថ្ងៃទី២៣ខែសីហាឆ្នាំ ២០១៦ ស្ថិតនៅចំណុចគុម្ពឫស្សី ខាងត្បូងភូមិ ក្នុងភូមិចុងខ្ញូង ឃុំមហាខ្ញូង ស្រុកកោះសូទិន ខេត្តកំពង់ចាម ។
ប្រភពព័ត៌មានពី មន្ត្រីនគរបាលមូលដ្ឋានបានឲ្យដឹងថា ជនរងគ្រោះមានឈ្មោះ សាយ ប៊ុនលីម( ហៅ ប៉ោង)ភេទប្រុស អាយុ៤៧ឆ្នាំ ភូមិ មានទីលំនៅក្នុងភូមិ ឃុំ កើតហេតុខាងលើ។
ប្រភពព័ត៌មាន នៅនឹងកន្លែងកើតហេតុបានឱ្យដឹងថា នៅមុនពេលកើតហេតុជនរងគ្រោះបានទៅកាប់ដើមឫស្សីនៅខាងត្បូងភូមិ ដើម្បីយកមកប្រើប្រាស់ តែបែរជាជួបហេតុការណ៍ ដ៏រន្ធត់ ដោយជនរងគ្រោះឡើងកាប់លើដើមឫស្សី ដែលដើមឫស្សី ត្រូវទឹកភ្លៀងសើម បានរអិលធ្លាក់ មកដី បុកជុង នឹងកាំបិត របស់ជនរងគ្រោះ ត្រូវចំ ដើមទ្រូងខាងស្តាំ ជាប់លេចមួយផ្លែកាំបិត បណ្តាលឲ្យស្លាប់បាត់បង់ជីវិត យ៉ាងអាណោចអាធ័មនៅកន្លែងកើតហេតុ ដែលមើលទៅគួរឲ្យរន្ធត់ស្មានថាជាករណីឃាតកម្ម ។
ក្រោយពេលកើតហេតុ កម្លាំងជំនាញបច្ចេកទេសនគរបាលស្រុកកោះសូទិន បានចុះទៅដល់កន្លែងកើតហេតុភ្លាមៗ ដើម្បីធ្វើការត្រួតពិនិត្យ ដោយពុំមានជាប់ពាក់ព័ន្ធលើករណីឃាតកម្មនោះទេ ហើយសពជនរងគ្រោះត្រូវបានប្រគល់ឲ្យក្រុមគ្រួសារ យកទៅធ្វើបុណ្យតាមប្រពៃណីផងដែរ ៕
ដោយ វណ្ណៈ
