ខេត្តកំពង់ស្ពឺ៖ ស្នងការដ្ឋាននគរបាលខេត្តកំពង់ស្ពឺ នៅថ្ងៃសៅរ៍ទី០៣ ខែឧសភា ឆ្នាំ២០២៥នេះ បានឱ្យដឹងថា អនុវត្តតាមបទបញ្ជានិងការចង្អុលដឹកនាំផ្ទាល់ពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ គ្រប់ក្រុង-ស្រុក ត្រូវពិនិត្យលេីក្រុមក្មេងទំនេីងដែលតែងតែបង្កអុកឡុកក្នុងមូលដ្ឋាន និងសកម្មភាពបង្ហោះម៉ូតូតាមផ្លូវសាធារណៈដែលបង្កភាពអាណាធិបតេយ្យប៉ះពាល់បង្កគ្រោះថ្នាក់ដល់អ្នកដទៃ ។
ជាក់ស្ដែងកម្លាំងផ្នែកនគរបាលយុត្តិធម៌នៃអធិការដ្ឋាននគរបាលស្រុកគងពិសី កាលពីយប់ថៃ្ងទី០១ ខែឧសភា ឆ្នាំ២០២៥ថ្មីៗនេះ បានឃាត់មុខសញ្ញាក្មេងទំនើងបង្ហោះម៉ូតូ ០២នាក់ ពាក់ព័ន្ធករណីបង្ហោះម៉ូតូ ក្រោយធ្វើសកម្មភាពត្រង់ចំណុចផ្លូវជាតិលេខ៤១ ចន្លោះគីឡូតិ៍ម៉ែត្រលេខ១២-១៣ ស្ថិតនៅភូមិដីក្រហម ឃុំរកាកោះ ស្រុកគងពិសី ។
យុវជនទំនើងទាំងពីរនាក់នេះ ទី១-ឈ្មោះ ដេត ឧត្ដម ភេទប្រុសអាយុ១៨ឆ្នាំ នៅភូមិព្រៃតាអូក ឃុំរកាកោះ ស្រុកគងពិសី អ្នកបេីកម៉ូតូបង្ហោះ។ និងទី២-ឈ្មោះ កាន ជីភីល ហៅស៊ីង ភេទប្រុស អាយុ១៥ឆ្នាំ នៅភូមិដីក្រហម ឃុំរកាកោះស្រុកគងពិសី អ្នកអង្គុយពីក្រោយ ។
បើតាមលោកវរសេនីយ៍ឯក យ៉ាង សុខលី អធិការនគរបាលស្រុក បានបញ្ជាក់ថា ក្រុមក្មេងទំនេីងបង្ហោះម៉ូតូ មានសកម្មភាពញឹកញាប់និងធ្វើការជិះម៉ូតូបង្ហោះទាំងយប់-ថៃ្ង ជាក់ស្តែង សមត្ថកិច្ចបានទទួលព័ត៌មាននិងបានឃ្លាំមេីលទេីបអនុវត្ដបានដូចថៃ្ងនេះ សមត្ថកិច្ចបានធ្វើការដកហូតម៉ូតូម៉ាកស៊ុយគីនិច ពណ៌លឿងលាយស គ្មានស្លាកលេខ។
គួរបញ្ជាក់ថា ចំពោះម៉ូតូសមត្ថកិច្ចរក្សាទុករយៈពេល៣ខែ និងបានអញ្ជេីញអាណាព្យាបាលមកធ្វេីកិច្ចសន្យានិងអប់រំដល់កូនចៅកុំអោយធ្វេីទង្វេីបែបនេះបន្ដទៀត ក្នុងករណីនៅបន្ដសមត្ថកិច្ចអនុវត្តនីតិវិធីផ្លូវច្បាប់៕
ដោយ៖តារា
