ខេត្តមណ្ឌលគិរី៖ លោក ហាស់ វិបុល ប្រធានមន្ទីរបរិស្ថានខេត្តមណ្ឌលគិរី ដែលត្រូវមន្ត្រីក្រោមឱវាទចំនួន១៩រូប ប្ដឹងទៅរដ្ឋមន្រ្តីក្រសួងបរិស្ថាន មានចំនួន៥ ចំណុចសំខាន់ៗ បន្ទាប់ពីលោកបានបំពេញតួនាទីការងារ ផ្ទុយពីនីតិវិធីច្បាប់សហលក្ខន្ដិក មន្ត្រីរាជការស៊ីវិល នៃក្រមបរិស្ថាន។
ជាក់ស្ដែងនៅក្នុងពាក្យបណ្ដឹងបស់មន្ត្រីក្រោមឱវាទចំនួន ១៩រូប ដាក់ទៅកាន់លោកបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ដេីម្បីប្ដឹងលោក ហាស់ វិបុល ប្រធានមន្ទីរបរិស្ថានខេត្តមណ្ឌលគិរី មានចំនួន ២ទំព័រ កាលពីថ្ងៃទី១៨ ខែមេសា ឆ្នាំ២០២៥កន្លងទៅថ្មីៗនេះ មានដូចខាងក្រោម៖
*ទី១៖ មានការបែងចែកតួនាទីភារកិច្ចជូនថ្នាក់ដឹកនាំមន្ទីរ នាំឱ្យមានការថ្នាំងថ្នាក់ពីថ្នាក់ដឹកនាំ ដោយសារតែលោក ឌិន ប៊ុនធឿន អនុប្រធានមន្ទីរ ១រូប ត្រូវទទួលបន្ទុកដឹកនាំដែនជម្រកសត្វព្រៃ ចំនួនប្រាំដែន ហើយថែមទាំងដឹកនាំការិយាល័យចំណេះដឹងបន្ថែមទៀត។ ក្រោយពីបានទទួលសិទ្ធិជាអនុប្រធានមន្ទីរ ទទួលបន្ទុកដែនជម្រក រួចមកលោក អនុប្រធានមន្ទីរ បានធ្វើការដោះដូរដាក់មន្ត្រីតាមទំនើងចិត្តដោយមិនមានកិច្ចប្រជុំឆ្លងយោបល់ពី ប្រធានការិយាល័យដែននោះទេ។ ការដឹកនាំបែបនេះ ជាការរំលោភបំពានសិទ្ធិអំណាចរបស់ ការិយាល័យរដ្ឋបាលធនធានមនុស្ស និងហិរញ្ញវត្ថុ។
*ទី២៖ លោកប្រធានមន្ទីរធ្វើសំណើទៅរដ្ឋបាលខេត្តស្នើសុំផ្លាស់ប្ដូរមន្ត្រីពីការិយាល័យមួយទៅ ការិយាល័យមួយទាំងដែលមិនបានប្រជុំវាយតម្លៃពីថ្នាក់ដឹកនាំមន្ទីរ ទាំងដែលគាត់មិនទាន់បានស្គាល់ឈ្មោះ និងស្គាល់មន្ត្រីអស់ផង ដោយមិនស្របតាមនីតិវិធីដែលផ្ទុយពីគោលការវិភាគមុខងាររបស់ ក្រសួងបរិស្ថាន និងក្រសួងមុខងារសាធារណៈ ជាក់ស្ដែងដូចជា ករណីដកលោក ញឹម វណ្ណៈ ពីអនុប្រធានការិយាល័យដែនជម្រកសត្វព្រៃភ្នំពេ្រច លំផាត់ ឱ្យមកបម្រើការងារជាអនុប្រធានការិយាល័យគាំពារបរិស្ថានវិញ។
*ទី៣៖ការដឹកនាំបែបចាប់កំហុសមន្ត្រីដូចជា ការចុះទៅតាមដែននីមួយៗលបទៅដោយមិនបានប្រាប់មន្ត្រី ឬ ប្រធានការិយាល័យដែន ដើម្បីឱ្យមានការចូលរួមជាក់ស្ដែងពេលគាត់ចុះ ដែនស្រែពក បានជួបក្រុមហ៊ុនឃុនយ័ន្ត កំពុងសិក្សារុករករ៉ែមាសដែលជាក្រុមហ៊ុនមានច្បាប់។ ប្រធានមន្ទីរប្រើពាក្យថា ចុះពិនិត្យទីតាំងរ៉ែមាស អនាធិបតេយ្យ ដោយមិនបានសួរនាំព័ត៌មានពីមន្ត្រី ការិយាល័យស្រែពកណាមលៀរ ថា ក្រុមហ៊ុននោះមានច្បាប់ ឬអត់ច្បាប់ ការដឹកនាំរបៀបនេះ ហាក់បីដូចជាមន្ត្រីតាមការិយាល័យដែន នីមួយៗមិនចង់សហការជាមួយគាត់។
*ទី៤៖ ការអនុវត្តច្បាប់មិនស្របតាម ក្រមបរិស្ថាន ជាក់ស្ដែងមានការដោះលែងជនសង្ស័យចំនួន២នាក់ និងរថយន្តសាំយ៉ុងចំនួន១គ្រឿងពាក់ព័ន្ធនឹងការដឹកជញ្ជូនសត្វព្រៃ ( សត្វពង្រូល )។
*ទី៥៖ ការប្រើប្រាស់មន្ត្រីមិនស្របទៅតាម ច្បាប់សហលក្ខន្ដិក មន្ត្រីរាជការស៊ីវិល ដោយមានបុគ្គលម្នាក់ពាក់ឯកសណ្ឋានមន្ត្រីឧទ្យានុរក្ស ដើរធ្វើការជាមួយមន្ត្រី ឧទ្យានុរក្ស នៅក្នុង ខែត្រមណ្ឌលគិរី ដែលមិនមែនជា មន្ត្រីឧទ្យានុរក្សក្របខណ្ឌ របស់មន្ទីរបរិស្ថានខេត្តមណ្ឌលគិរី។
ជុំវិញករណីខាងលើនេះ លោក ហាស់ វិបុល ប្រធានមន្ទីរបរិស្ថានខេត្តមណ្ឌលគិរី នៅរសៀលថ្ងៃចន្ទទី០៥ ខែឧសភា ឆ្នាំ២០២៥នេះ បានប្រាប់អង្គភាពកាសែតនគរវត្ត និងនគរដ្រេហ្គន តាមប្រព័ន្ធបណ្ដាញសង្គមតេឡេក្រាមរបស់លោកផ្ទាល់ យ៉ាងដូច្នេះថា៖ “ប្រសិនបើមន្រ្តីណាមានកំហុសនោះ ក្រសួងនិងចាត់វិធានការទៅតាមច្បាប់សហលក្ខន្តិកៈមន្រ្តីរាជការ។ យូរថ្ងៃហើយមិនបានឆ្លើយតបទៅនរណាម្នាក់ទេ ទុកជូនថ្នាក់នាំខេត្ត និងក្រសួងពិនិត្យសម្រេច។ ដោយមានការទទូចស្នើសុំពីលោកប្អូននោះ និងព្យាយាមសរសេរយ៉ាងវែង(លើកទី១) ខ្ញុំបាទសាកល្បងជូនចម្លើយ និងប្រកបដោយវិជ្ជាវៈបន្តិចបន្តួចជូនលោកប្អូន ដូចខាងក្រោម។ ដោយក្តីគោរាប់អានបំផុត🙏🙏🙏”
ជាមួយគ្នានេះ លោក ខៃ អាទិត្យា អ្នកនាំពាក្យក្រសួងបរិស្ថាន នៅរសៀលថ្ងៃនេះដែរ អង្គភាពយើង ក៏បានធ្វើការទំនាក់ទំនងតាមប្រព័ន្ធបណ្ដាញសង្គមតេឡេក្រាមផ្ទាល់ ដេីម្បីសុំបំភ្លឺជុំវិញករណីខាងលើនេះ “គាត់បានចូលមើល ប៉ុន្តែគ្មានការឆ្លើយតប”ដូចគ្នា។
គួររម្លឹកផងដែរថា កាលពីថ្ងៃទី១ ខែធ្នូ ឆ្នាំ២០២០កន្លងទៅ លោក ហាស់ វិបុល កាលនៅជា អនុប្រធានមន្ទីរ ខេត្តក្រចេះ ត្រូវបានលោក វ៉ា ថន អភិបាល ខេត្តក្រចេះ ធ្វើលិខិតស្នើសុំដកចេញពី នាយកដែនជម្រកសត្វព្រៃ ព្រៃឡង់ ឱ្យមកបម្រើការងារនៅមន្ទីរបរិស្ថានខេត្តក្រចេះវិញ ក៏ព្រោះតែរឿងដឹកជញ្ជូនឈើចេញពីព្រៃឡង់ឥតឈប់ឈរ។
សូមជម្រាបថា លោក ហាស់ វិបុល ប្រធានមន្ទីរបរិស្ថានខេត្តមណ្ឌលគិរី ទើបឡើងកាន់តំណែងថ្មី កាលពីថ្ងៃទី២០ ខែមករា ឆ្នាំ២០២៥ តាមរយៈអនុក្រឹត្យ លេខ៦២ / អនក្រ. តត។ ប៉ុន្តែការឡើងធ្វើប្រធានមន្ទីរបរិស្ថានថ្មីនេះ ក៏មានប្រតិកម្មប្ដឹងតវ៉ាទៅដល់ រដ្ឋមន្ត្រីក្រសួងបរិស្ថាន ជាសាម៉ីអង្គភាពនោះទំនងជាធ្វើឱ្យខូចផលប្រយោជន៍បុគ្គល៕
ដោយ៖ស តារា
