ខេត្តកំពង់ធំ៖ ខណ:បទល្មើសនេសាទនៅតែបន្ដកើត ឡើងក្ដៅគគុកក្នុងតំបន់ភូមិសាស្ត្រឃុំ ផាត់សណ្ដាយ ស្រុកកំពង់ស្វាយ នៅព្រឹកថ្ងៃទី៦ ខែឧសភា ឆ្នាំ២០២៥ កម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ សហការជាមួយកម្លាំងចម្រុះ បង្ក្រាបបទល្មើសនេសាទខុសច្បាប់ នៅក្នុងតំបន់បឹងទន្លេសាប ក្នុងភូមិ សាស្ត្រឃុំផាត់សណ្ដាយ ស្រុកកំពង់ស្វាយ និងឃុំពាមបាង ស្រុកស្ទោង ខេត្តកំពង់ធំ ដូចភ្លៀងរលឹម ដោយគ្មានការដក ថយឡេីយ ដើម្បីការពារធនធានមច្ឆជាតិ សម្រាប់សង្គម ជាតិទាំងមូល និងបម្រើសេចក្តីត្រូវការរបស់ប្រជាជនកម្ពុជា នៅពេលបច្ចុប្បន្ន និងទៅអនាគត។
ព្រឹកថ្ងៃទី៦ ខែឧសភា ឆ្នាំ២០២៥ លោកវរសេនីយ៍ឯក អ៊ូ ឆេងកន មេបញ្ជាការរងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ និងជាប្រធានទីបញ្ជាការស្រាលបង្ក្រាបបទល្មើសនេសាទខុសច្បាប់ ប្រចាំការនៅឃុំផាត់សណ្ដាយ បានដឹកនាំកម្លាំងចមុះ ធ្វើសកម្មភាពបង្ក្រាបបទល្មើសនេសាទជាក់ស្ដែងនៅតំបន់ ចាប់ពីជ្រោយវែងចំណុច ដល់ចុងព្រែកតាសោម ភូមិសាស្ត្របឹងទន្លេសាបឃុំផាត់សណ្តាយ និងបង្ក្រាបឧបករណ៍បទល្មើស អួនក្រញឹក និងរបាំង មានប្រវែង២៥០ម៉ែត្រ ឡុកចំនួន ២ឡុក លបចំនួន២មាត់ រុះរើលបលូខុសទំហំក្រឡាកំណត់ បានចំនួន ៦មាត់ បំផ្លាញអួនស្បៃមុងដែលច្បាប់បានហាមឃាត់ដាច់ខាតបាន ចំនួន ៣របាំង មានប្រវែង ៣០០ម៉ែត្រ និងឧបករណ៍ល្មើសនេសាទខុសច្បាប់មួយចំនួនទៀត។
លោកឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងខេត្តកំពង់ធំ កោតសរសើរចំពោះ កងកម្លាំងចម្រុះទាំងអស់ ដែលបានខិតខំបំពេញភារកិច្ចមិនខ្លាចលំបាកនឿយហត់ ក្នុងការអនុវត្តតាមបទបញ្ជារបស់ប្រមុខរាជរដ្ឋាភិបាល និងថ្នាក់ដឹកនាំគ្រប់លំដាប់ ថ្នាក់នៃកងយោធពលខេមរភូមិន្ទ ដើម្បីផលប្រយោជន៍របស់សង្គមជាតិ និងប្រជាជនកម្ពុជាទាំងមូល។
ជាមួយនោះដែរលោកឧត្តមសេនីយ៍ទោ ក៏បានដាក់បទ បញ្ជាដល់កងកម្លាំងចម្រុះទាំងអស់ ត្រូវបន្តសកម្មភាពបង្ក្រាបបទល្មើសនេសាទខុសច្បាប់នេះ ឲ្យដូចភ្លៀង រលឹមបន្តទៀត ដោយគ្មានការដកថយឡើយ ធ្វើយ៉ាង ណាកុំឲ្យមានការកើតឡើងនូវបទល្មើសនេសាទខុសច្បាប់ដដែលៗ កេីនឡេីងជាថ្មីទៀតបានឡើយ៕
