ខេត្តរតនគិរី៖ លោកវរៈសេនីយ៍ទោ ផាង ប៉ែត អធិការ និងលោកវរៈសេនីយ៍ត្រី អ៊ុត សឿងអធិការរង ស្រុកកូនមុំ ខេត្តរតនគិរី ត្រូវបានលោកអភិសន្ដិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្រេចផ្អាកការងារបណ្តោះអាសន្នចំពោះមន្ត្រីនគរបាលចំនួន ២រូប នៃអធិការដ្ឋាននគរបាលស្រុកកូនមុំ ស្នងការដ្ឋាននគរបាលខេត្តរតនគិរី ចំណុះអគ្គស្នងការដ្ឋាននគរបាលជាតិ ដើម្បីបើកផ្លូវឱ្យតុលាការបន្តនីតិវិធី តាមផ្លូវច្បាប់។
សាមីខ្លួនដែលមានឈ្មោះក្នុងសេចក្ដីសម្រេចខាងលើ ត្រូវមកបង្ហាញខ្លួនរៀងរាល់ម៉ោងធ្វើការនៅការិយាល័យបុគ្គលិក នៃស្នងការដ្ឋាននគរបាលខេត្តរតនគិរី រហូតដល់មានការសម្រេចជាថ្មី។
ដូច្នេះអគ្គលេខាធិការនៃអគ្គលេខាធិការដ្ឋាន អគ្គស្នងការនៃអគ្គស្នងការដ្ឋាននគរបាលជាតិ អគ្គនាយកនៃ អគ្គនាយកដ្ឋានធនធានមនុស្ស ក្រុមប្រឹក្សានិងគណៈអភិបាលខេត្តរតនគិរី ប្រធាននាយកដ្ឋានបុគ្គលិក មន្ត្រីនគរបាលជាតិ ប្រធាននាយកដ្ឋានគោលនយោបាយ ប្រធាននាយកដ្ឋាន អង្គភាពពាក់ព័ន្ធ ស្នងការនៃ ស្នងការដ្ឋាននគរបាលខេត្តរតនគិរី និងសាមីខ្លួនត្រូវអនុវត្តតាមប្រកាសនេះចាប់ពីថ្ងៃចុះហត្ថលេខាតទៅ៕
ដោយ៖តារា
