ខេត្តរតនគិរី÷តាមរយៈ facebook ផេក របស់លោកហេង រតនា អគ្គនាយក មជ្ឈមណ្ឌល កំចាត់មីនកម្ពុជាបានឲ្យដឹងថា ប្រជាពលរដ្ឋប្រទះឃើញគ្រាប់បែកចង្កោមចំនួន១៣២ គ្រាប់ហេីយ កូនគ្រាប់បែកដែលនៅសេស សល់ក្នុងបំពង់ប្រហែលចំនួន១២០គ្រាប់នៅក្នុងចំការស្វាយចន្ទី។
លោកអគ្គនាយកបានសរសេរថា នៅថ្ងៃទី១២ ខែឧសភា ឆ្នាំ២០២៥ នៅក្នុងចម្ការស្វាយចន្ទីដែលមានទីតាំងស្ថិត នៅ ភូមិកាម៉ែនធំ ឃុំសាមគ្គី ស្រុកអូរជុំ ខេត្តរតនគិរី អ្នក ឯកទេសកម្ទេចគ្រឿងផ្ទុះអង្គភាពស៊ីម៉ាក់ ចំណុះកងឯក ភាពកំចាត់មីនទី៥ បានដោះនិងកម្ទេចប្រភេទគ្រាប់បែកចង្កោមទម្លាក់ពីលើយន្តហោះប្រភេទ CBU-25/A ដែល មានផ្ទុកគ្រាប់បែកចង្កោម (កូនគ្រាប់ប្រភេទ BLU-24/B) ចំនួន១៣២ គ្រាប់បែក ហេីយកូនគ្រាប់បែកដែលនៅសេសសល់ក្នុងបំពង់ប្រហែលចំនួន១២០គ្រាប់ អាចបង្កគ្រោះថ្នាក់។ ស្ថានភាពរណ្តៅដែលរកឃើញគ្រាប់បែកចង្កោមនេះមានជម្រៅកប់ដីប្រហែលមួយម៉ែត្រ។
គួរជម្រាបរំលឹកជូនបន្ថែមថា នៅក្នុងព្រះរាជាណាចក្រដ៍កំសត់នេះត្រូវរងការទម្លាក់គ្រាប់បែកចង្កោមមានចំនួនជិត៣០លានគ្រាប់បែក ប្រេីពេលជាង១០ឆ្នាំក្នុងសម័យសង្គ្រាមចន្លោះពីដើមទសវត្សរ៍១៩៦០ដល់ពាក់កណ្តាលទសវត្សរ៍១៩៧០ មានការវាយប្រហារចំនួនជាង១០. ០០០ទីតាំងក្នុងក្របខណ្ឌទូទាំងប្រទេស។
សូមអរគុណម្ចាស់ចម្ការស្វាយចន្ទី ដែលបានផ្តល់ការសហការយ៉ាងពេញលេញជាមួយក្រុមជំនាញ ដោយ សារស្ថានភាពគ្រាប់បែកចង្កោមនេះគ្មានសុវត្ថិភាពក្នុងការដោះបន្សាបនិងដឹកជញ្ជូនឡេីយ ដូចនេះមានតែវិធានការកម្ទេចចោលនៅហ្នឹងកន្កែងតែម្តង។ ការកម្ទេចនៅហ្នឹងកន្លែងនេះបានបង្កប៉ះពាល់ដេីមស្វាយចន្ទីមួយ ចំនួនដែរ តែម្ចាស់ចម្ការនឹងមានសេចក្តីសុខសុវត្ថិភាពផុតពីគ្រោះភ័យនៃគ្រាប់បែកចង្កោមទាំងនេះជារៀងរហូត៕