អាម៉េរិក៖ ទីភ្នាក់ងារអាកាសចរណ៍អង្គការសហប្រជាជាតិនៅថ្ងៃទី ១៣ ខែ ឧសភានេះបានសម្រេចចោទប្រកាន់រុស្ស៊ីជាផ្លូវការថាជាអ្នកបាញ់ទម្លាក់យន្តហោះដែលផ្ទុកអ្នកដំណើរសរុប ២៩៨នាក់ដែលបានធ្វើដំណើរពី Amsterdam ទៅកាន់ទីក្រុង Kuala Lumpur ដែលត្រូវបានរុស្ស៊ីបាញ់ធ្លាក់ក្រោយឆ្លងកាត់ Donbas នៃប្រទេសអ៊ុយក្រែន អំឡុងពេលផ្ទុះភាពតានតឹងរវាងប្រទេសទាំងពីរកាលពីឆ្នាំ ២០១៤។

យោងតាមសេចក្តីប្រកាសរបស់ទីភ្នាក់ងារអាកាសចរណ៍អង្គការសហប្រជាជាតិ រុស្ស៊ីជាអ្នកទទួលខុសត្រូវចំពោះការធ្លាក់យន្តហោះម៉ាឡេស៊ី MH17 លើភាគខាងកើតអ៊ុយក្រែនក្នុងខែកក្កដា ឆ្នាំ ២០១៤។ រដ្ឋមន្ត្រីការបរទេសអូស្ត្រាលី លោកស្រី Penny Wong បាននិយាយនៅក្នុងសេចក្តីថ្លែងការណ៍មួយថា “យើងសូមអំពាវនាវដល់ប្រទេសរុស្ស៊ី ឱ្យប្រឈមមុខនឹងការទទួលខុសត្រូវរបស់ខ្លួនចំពោះអំពើហិង្សាដ៏អាក្រក់នេះ និងផ្តល់សំណងសម្រាប់ការប្រព្រឹត្តដ៏អាក្រក់របស់ខ្លួន” ដែលបានបាញ់ទម្លាក់យន្តហោះអ្នកដំណើរ។

ភ្លាមៗក្រោយពីចោទប្រកាន់រុស្ស៊ីជាផ្លូវការភាគីរុស្ស៊ីនៅមិនទាន់ចេញមុខបកស្រាយលម្អិតនៃការចោទប្រកាន់របស់ភ្នាក់ងារអាកាសចរណ៍អង្គការសហប្រជាជាតិនៅឡើយនោះទេ។
សូមបញ្ជាក់ថា ៖ ការពិតត្រូវបានលាតត្រដាងហើយ! ថ្ងៃនេះក្រុមប្រឹក្សាអាកាសចរណ៍របស់អង្គការសហប្រជាជាតិបានសម្រេចប្រកាសថាប្រទេសរុស្ស៊ីគឺជាអ្នកទទួលខុសត្រូវចំពោះហេតុការណ៍ធ្លាក់យន្តហោះម៉ាឡេស៊ី MH17នៅលើទឹកដីអ៊ុយក្រែនកាលពីឆ្នាំ២០១៤ដែលបណ្តាលឲ្យអ្នកដំណើរនិងអាកាសយានិកសរុបចំនួន២៩៨នាក់ស្លាប់។ ជើងហោះហើរ MH17 នេះរបស់ក្រុមហ៊ុនអាកាសចរណ៍ម៉ាឡេស៊ី បានចាកចេញពីទីក្រុង Amsterdam ទៅកាន់ទីក្រុង Kuala Lumpur កាលពីថ្ងៃទី១៧ ខែកក្កដា ឆ្នាំ២០១៤ ហើយត្រូវបានបាញ់ទម្លាក់នៅភាគខាងកើតប្រទេសអ៊ុយក្រែន ខណៈដែលការប្រយុទ្ធគ្នាបានកើតឡើងរវាងក្រុមផ្តាច់ខ្លួនដែលគាំទ្ររុស្ស៊ី និងកងកម្លាំងអ៊ុយក្រែន ៕ ដោយ ៖ សិលា