ខេត្តកំពង់ចាម÷ អាជ្ញាធរ ព្រះសង្ឃ និងប្រជាពលរដ្ឋ ឃុំព្រែកដំបូក ស្រុកស្រីសន្ធរ ស្នើសុំផ្លាស់ប្ដូរសេវាករផ្គត់ ផ្គង់ទឹកស្អាត ខណៈបញ្ហាផ្គត់ផ្គង់ទឹកស្អាតនេះកើតឡើងជាយូរឆ្នាំមកហើយពុំមានដំណោះស្រាយ។
អាជ្ញាធរ ព្រះសង្ឃ និងប្រជាពលរដ្ឋក្នុងឃុំព្រែកដំបូក ស្រុកស្រីសន្ធរ បាននាំគ្នាបង្ហោះសារលើបណ្ដាញសង្គមពីបញ្ហាផ្គត់ផ្គង់ទឹកស្អាត ខណៈសេវាករផ្គត់ផ្គង់មិនគ្រប់ គ្រាន់តាមតម្រូវការ និងទឹកមិនស្អាតទៀត។ ចំពោះបញ្ហាមួយនេះបានកើតឡើងជាយូរឆ្នាំមកហើយ ដោយគ្មានដោះស្រាយ ដូច្នោះប្រជាពលរដ្ឋ ព្រះសង្ឃ និងអាជ្ញាធរមូលដ្ឋាន ស្នើសុំដល់ រដ្ឋបាលខេត្តកំពង់ចាម ជាពិសេស លោក អ៊ុន ចាន់ដា អភិបាលខេត្តកំពង់ចាម ធ្វើការដោះ ស្រាយបញ្ហាមួយនេះផង។
កាលពីថ្ងៃទី ៣០ ខែមករា ឆ្នាំ ២០២៥ កន្លងទៅ លោកអភិបាលខេត្តកំពង់ចាម បានដឹកនាំមន្ត្រីជំនាញចុះមកពិនិត្យស្ថានភាព និងដោះស្រាយម្តងហើយ ដោយទុកឱសានវាទ ៣ ខែ ប៉ុន្តែគិតមកដល់ពេលនេះរយៈពេល ៥ ខែហើយ ពុំមានដោះស្រាយឡើយ។
បើតាមកិច្ចប្រជុំកាលពីថ្ងៃទី ៣០ ខែមករា ឆ្នាំ ២០២៥ លោក ប៊ិន ឡាដា អភិបាលស្រុកស្រីសន្ធរ បានឲ្យដឹងថា សេវាករដែលទទួលបានអាជ្ញាប័ណ្ណក្នុងការផ្គត់ផ្គង់ទឹកស្អាត នៅក្នុងឃុំព្រែកដំបូកនេះ គឺចាប់តាំងពីឆ្នាំ ២០១២ មកម្ល៉េះ ហើយបញ្ហាកង្វះទឹកស្អាតប្រើប្រាស់បានកើតឡើងនៅឆ្នាំ ២០១៤ រហូតមកដល់បច្ចុប្បន្ន។
លោកអភិបាលស្រុក បានបញ្ជាក់ថា នៅក្នុងអំឡុងពេលមានបញ្ហាការផ្គត់ផ្គង់ទឹកស្អាតនេះ គឺប្រជាពលរដ្ឋបានប្រើប្រាស់ទឹកមិនស្អាត ទឹកមានកករ និងប្រើទឹកមិនគ្រប់គ្រាន់ ឬមានពេលខ្លះ ដាច់ទឹករយៈពេលយូរថ្ងៃថែមទៀតផង។
ពាក់ព័ន្ធករណីខាងលើនេះ លោក ប៊ិន ឡាដា បញ្ជាក់ឲ្យដឹងថា បន្ទាប់ពីទទួលបានការរាយការណ៍ និងចុះពិនិត្យជាច្រើនលើកច្រើនសាមក អាជ្ញាធរឃុំ ព្រះសង្ឃ និងប្រជាពលរដ្ឋនៅក្នុងឃុំព្រែកដំបូកនេះ បានធ្វើការបង្ហោះសារលើបណ្តាញសង្គម និងដាក់ពាក្យតាមរយៈរដ្ឋបាលស្រុកទៅថ្នាក់ខេត្ត ដើម្បីស្នើសុំផ្លាស់ប្ដូរសេវាករផ្គត់ផ្គង់ទឹកស្អាតចេញ៕
