ភ្នំពេញ៖ បុរសម្នាក់បើកម៉ូតូសណ្តោងរ៉ឺម៉កដឹកបន្លែគេចពីជង្ហុកក៏ជ្រុលទៅបុករថយន្តម៉ាកឡិចស៊ីសGX470 បណ្តាលអោយរងការខូចខាតទាំងសងខាង ។
ហេតុការណ៍នេះបានកើតឡើងនៅវេលាម៉ោង១២និង០៥នាទីរំលងអធ្រាត្រឈានចូលថ្ងៃទី៣០ខែឧសភាឆ្នាំ២០២៥ នៅម្តុំកៅដាយ ផ្លូវលេខ២០៥កែងផ្លូវលេខ៣៨៨ សង្កាត់ទួលស្វាយព្រៃទី២ ខណ្ឌបឹងកេងកង រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់បើកម៉ូតូសណ្ដោងរ៉ឺម៉កដឹកបន្លែចម្រុះពេញមួយរ៉ឺម៉កធ្វើដំណើរតាមបណ្ដោយផ្លូវលេខ២០៥ក្នុងទិសដៅពីលិចទៅកើត លុះមកដល់ចំណុចកើតហេតុក៏បានគេចពីជង្ហុកមួយធ្វើឲ្យរ៉ឺម៉កម៉ូតូជ្រុលទៅបុករថយន្តម៉ាកឡិចស៊ីស GX470 ពណ៌ស ពាក់ស្លាកលេខ ខេមរភូមិន្ទ 02.2 1831 ដែលបើកដោយបុរសម្នាក់ក្នុងទិសដៅបញ្ច្រាសគ្នាបណ្ដាលឲ្យ រ៉ឺម៉ករងការខូចខាតជាមួយនឹងបន្លែមួយចំនួន រីឯអ្នកបើកម៉ូតូរបួសតិចតួច ។
ដោយឡែករថយន្តវិញរងការខូចខាតផ្នែកខាងមុខនិងបែកកង់ខាងឆ្វេង តែអត់មានគ្រោះថ្នាក់ដល់អ្នកបើកបរនោះទេ។
ក្រោយកើតហេតុ ភាគីទាំងសងខាង បានសម្របសម្រួលគ្នា គឺសុខចិត្តយកមធ្យោបាយទៅជួសជុលរៀងៗខ្លួនដើម្បីបញ្ចប់រឿង៕
ដោយ៖សុខាសែនជ័យ
