ភ្នំពេញ ៖ រថយន្តស៊េរីទំនើប៣គ្រឿងបានបុកបន្តកន្ទុយគ្នាបណ្ដាលឲ្យរងការខូតខាតយ៉ាងដំណំ កាលពីវេលាម៉ោង១០យប់ថ្ងៃទី២៦ ខែសីហា ឆ្នាំ២០១៦ នៅផ្លូវខាងក្រោយឈាងខាងជើងស្ថានទូតអូស្ត្រាលី ស្ថិតក្នុងសង្កាត់ទន្លេបាសាក់  ខណ្ឌចំការមន ។

តាមប្រភពពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញរថយន្ត ឡិចស៊ីស RX 300 ពណ៌ស មួយគ្រឿងបើកបរដោយបុរសម្នាក់យ៉ាងលឿនទំនងជាស្រវឹង បើកតាមបណ្តោយផ្លូវកើតហេតុខាងលើ ទិសដៅពីលិចទៅកើត ខណៈមានចំណុចកើតហេតុរថយន្តបានរ៉េចង្កូតទៅបុកពីក្រោយរថយន្ត ឡង់គ្រីសឺ ពាក់ស្លាកលេខភ្នំពេញ 2AC-3888 ដែលចតចោលនៅផ្លូវអែបខាងស្តាំដៃ បណ្តាលដាច់ធ្លាក់កាងនិងបែកស្តុបពីក្រោយ តែដោយល្បឿនរបស់ ឡិចស៊ីស RX300 លឿន បានរុញរថយន្តឡង់គ្រីសឺ ទៅបុកផ្ទប់ពីក្រោយរថយន្តម៉ាក ផច់ ស្លាកលេខ 1AV-8787 បណ្តាលឲ្យរថយន្តឡង់គ្រីសឺ ខូតខាតពីមុខបន្ថែមទៀត ចំណែករថយន្ត ផច់ កំពិតបាក់កាងក្រោយ ។

ក្រោយពេលកើតហេតុសមត្ថកិច្ចមូលដ្ឋានបានទៅដល់កន្លែងកើតហេតុតែភាគីទាំង៣ បានសុំចរចរាគ្នា ក្រោយមកដោយកចរចារគ្នាជាងមួយម៉ោងមិនត្រូវរ៉ូវគ្នា ទើបសមត្ថកិច្ចជំនាញ មកធ្វើកាវាស់វែងយករថយន្តទាំង៣ ទៅអធិការដ្ធាននគរបាលខណ្ឌចំការមនដើម្បីរង់ចាំការដោះស្រាយ ៕

ដោយ៖ជីម ភារ៉ា ដង្កោ