ជំនួបរវាងគណៈប្រតិភូរុស្ស៊ី នឹងអ៊ុយក្រែនបានធ្វើឡើងក្នុងបរិបទនៃការបន្តប្រយុទ្ធគ្នា ខណៈភាគីទាំងពីរបានបើកការវាយប្រហារផ្លូវអាកាសចូលជ្រៅក្នុងទឹកដីរបស់គ្នាទៅវិញទៅមក។

គណៈប្រតិភូរុស្ស៊ី និងអ៊ុយក្រែនបានជួបពិភាក្សាផ្ទាល់ជាលើកទីពីរក្នុងរយៈពេលតែជាងពីរសប្តាហ៍ប៉ុណ្ណោះនៅថ្ងៃទី 2 ខែមិថុនា ប៉ុន្តែការរំពឹងទុកសម្រាប់វឌ្ឍនភាពសំខាន់ៗណាមួយក្នុងការបញ្ចប់ជម្លោះមានកម្រិតទាប។
មន្ត្រីទួរគីបាននិយាយថា កិច្ចប្រជុំដែលបានចាប់ផ្តើមនៅម៉ោង១រសៀល។ នៅទីក្រុងអុីស្តង់ប៊ុល ដឹកនាំដោយរដ្ឋមន្ត្រីការបរទេសទួរគី លោក Hakan Fidan ។ យោងតាម AP គណៈប្រតិភូអ៊ុយក្រែនដឹកនាំដោយរដ្ឋមន្ត្រីការពារជាតិ Rustem Umerov ខណៈដែលគណៈប្រតិភូរុស្ស៊ីដឹកនាំដោយលោក Vladimir Medinsky ដែលជាជំនួយការរបស់ប្រធានាធិបតីរុស្ស៊ីលោក Vladimir Putin ។
ការអត្ថាធិប្បាយថ្មីៗរបស់មន្ត្រីជាន់ខ្ពស់នៃប្រទេសទាំងពីរបានបង្ហាញថា ពួកគេនៅតែមានការខ្វែងគំនិតគ្នាជាច្រើនលើលក្ខខណ្ឌសំខាន់ៗសម្រាប់ការបញ្ចប់ជម្លោះ។ កិច្ចពិភាក្សាជុំទីមួយដែលបានធ្វើឡើងនៅថ្ងៃទី 17 ខែឧសភាផងដែរនៅទីក្រុងអុីស្តង់ប៊ុលបានបញ្ចប់ក្នុងរយៈពេលតិចជាងពីរម៉ោង។ ទោះបីជាភាគីទាំងសងខាងបានយល់ព្រមលើការដោះដូរអ្នកទោសធំក៏ដោយ ។
ប្រធានាធិបតីអាមេរិកលោក Donald Trump បានជំរុញឱ្យរុស្ស៊ី និងអ៊ុយក្រែនឈានដល់កិច្ចព្រមព្រៀងសន្តិភាព ហើយសេតវិមានបានព្រមានម្តងហើយម្តងទៀតថា សហរដ្ឋអាមេរិកនឹងដកខ្លួនចេញពីតួនាទីជាអ្នកសម្របសម្រួល ប្រសិនបើភាគីទាំងពីរបន្តពន្យារពេល។
ជំនួបរវាងគណៈប្រតិភូរុស្ស៊ី នឹងអ៊ុយក្រែនបានធ្វើឡើងចំពេលមានការប្រយុទ្ធគ្នាជាបន្តបន្ទាប់ ខណៈដែលភាគីទាំងពីរបានបើកការវាយប្រហារតាមអាកាសយ៉ាងជ្រៅទៅក្នុងទឹកដីរបស់គ្នាទៅវិញទៅមក។ ក្រសួងការពារជាតិរុស្ស៊ីបាននិយាយកាលពីថ្ងៃទី 2 ខែមិថុនាថា ការការពារដែនអាកាសរុស្ស៊ីបានបាញ់ទម្លាក់យន្តហោះគ្មានមនុស្សបើកអ៊ុយក្រែនចំនួន 162 គ្រឿងនៅក្នុងតំបន់ចំនួនប្រាំបីរបស់រុស្ស៊ីក្នុងរយៈពេលមួយយប់ក៏ដូចជានៅលើឧបទ្វីបគ្រីមៀដែលគ្រប់គ្រងដោយរុស្ស៊ី។ កងការពារដែនអាកាសរបស់អ៊ុយក្រែនបាននិយាយថា កងកម្លាំងរបស់ពួកគេក៏បានបំផ្លាញយន្តហោះគ្មានមនុស្សបើករុស្ស៊ីចំនួន 52 គ្រឿងក្នុងចំណោម 80 គ្រឿងផងដែរ។
នាថ្ងៃទី ១ មិថុនា អ៊ុយក្រែនបានប្រកាសការវាយប្រហារដ៏គួរឱ្យភ្ញាក់ផ្អើលមួយទៅលើមូលដ្ឋានទ័ពអាកាសរុស្ស៊ីចំនួន ៥ នៅចម្ងាយរាប់ពាន់គីឡូម៉ែត្រពីក្បែរទីក្រុងមូស្គូ ទៅកាន់គោលដៅនៅតំបន់អាក់ទិក ស៊ីបេរី និងចុងបូព៌ា។ គោលដៅមានចម្ងាយជាង ៧.០០០ គីឡូម៉ែត្រពីប្រទេសអ៊ុយក្រែន។ អ៊ុយក្រែនបាននិយាយថា យន្តហោះចម្បាំងរុស្ស៊ីជាង៤០គ្រឿងត្រូវបានបំផ្លាញ ដោយប្រធានាធិបតីអ៊ុយក្រែនលោក Volodymyr Zelensky បានហៅវាថាជាប្រតិបត្តិការដ៏ត្រចះត្រចង់ ដែលចំណាយពេលជាងមួយឆ្នាំដើម្បីរៀបចំ៕ ដោយធីរីណា

រូបថត​: Tass