កីឡាករ Raheem Sterling, Joao Felix, Axel Disasi និង Ben Chilwell ត្រូវបានកាត់ចេញពីក្រុម Chelsea សម្រាប់ការប្រកួត FIFA Club World Cup ខណៈដែល Jack Grealish មិនត្រូវបានជ្រើសរើសដោយ Manchester City ទៅលេងនៅទឹកដីអាមេរិកឡើយ។

ខ្សែប្រយុទ្ធជម្រើសជាតិអង់គ្លេស Grealish ត្រូវបានគេរំពឹងថានឹងអវត្តមាន ខណៈដែលកីឡាករវ័យ 29 ឆ្នាំរូបនេះបានចាប់ផ្តើមការប្រកួតត្រឹមតែចំនួន 7 ដងក្នុងឆ្នាំ 2024-25 ។ កីឡាករទាំង 27 របស់ Man City ក៏មិនរាប់បញ្ចូលអតីតប្រធានក្រុម Kyle Walker ដែលបានចំណាយពេលពាក់កណ្តាលទីពីរនៃរដូវកាលមុនក្នុងការខ្ចីជើងនៅ AC Milan ប៉ុន្តែមានខ្សែការពារអង់គ្លេស John Stones ដែលមិនបានលេងតាំងពីខែកុម្ភៈ ដោយសាររបួសភ្លៅត្រូវបានជ្រើសរើសទៅវិញ។

ចំណែកក្រុមតោខៀវ Chelsea ដែលមាន 28 នាក់មិនមានកីឡាករ៤រូបដែលធ្វើឱ្យពួកគេចំណាយអស់ប្រហែល 179 លានផោនក្នុងថ្លៃផ្ទេរ ហើយទាំងអស់នោះបានបញ្ចប់កាលពីរដូវកាលមុនដោយខ្ចីជើង។

Sterling មានតម្លៃ 50 លានផោននៅពេលដែលគាត់បានមកពី Manchester City ក្នុងឆ្នាំ 2022 ប៉ុន្តែខ្សែប្រយុទ្ធអង់គ្លេសវ័យ 30 ឆ្នាំរូបនេះបានចំណាយកាលពីរដូវកាលមុនក្នុងលក្ខខ័ណ្ឌខ្ចីជើងជាមួយ Arsenal ដោយចាប់ផ្តើមលេងបានត្រឹមតែ 13 ប្រកួត និងស៊ុតបញ្ចូលទីបានម្តង។ Felix បានផ្លាស់ទៅ Chelsea ជាអចិន្ត្រៃយ៍កាលពីរដូវក្តៅមុនក្នុងតម្លៃ 45 លានផោន និងស៊ុតបញ្ចូលទីបាន 7 គ្រាប់ពីការបង្ហាញខ្លួន 20 មុនពេលខ្សែប្រយុទ្ធព័រទុយហ្គាល់វ័យ 25 ឆ្នាំបានបញ្ចប់យុទ្ធនាការក្នុងលក្ខខណ្ឌខ្ចីជើងនៅ AC Milan ។ ក្រុមតោខៀវបានចំណាយប្រាក់ 38.5 លានផោនដើម្បីចុះហត្ថលេខាលើ Axel Disasi ពី Monaco ក្នុងឆ្នាំ 2023 ហើយខ្សែការពារសញ្ជាតិបារាំងវ័យ 27 ឆ្នាំរូបនេះបានលេង 17 ប្រកួតកាលពីរដូវកាលមុនមុនពេលបញ្ចប់រដូវកាលក្នុងលក្ខខ័ណ្ឌខ្ចីជើងជាមួយ Aston Villa ។

កីឡាករ Chilwell ត្រូវបានតោខៀវទិញលើតម្លៃ 45 លានផោនក្នុងឆ្នាំ 2020 ហើយបន្ទាប់ពីលេងជាមួយ Chelsea ត្រឹមតែមួយប្រកួតកាលពីរដូវកាលមុន ខ្សែការពារឆ្វេងសញ្ជាតិអង់គ្លេសវ័យ 28 ឆ្នាំបានចំណាយពេលនៅសល់នៃរដូវកាលនេះជាមួយ Crystal Palace ដោយក្លាយជាកីឡាករបម្រុងដែលមិនប្រើប្រាស់ក្នុងការប្រកួតវគ្គផ្តាច់ព្រ័ត្រ Eagles’ FA Cup លើក្រុម Manchester City ។

អ្នកចាំទីសញ្ជាតិស៊ែប៊ី Djordje Petrovic វ័យ 25 ឆ្នាំនឹងមិនធ្វើដំណើរទៅសហរដ្ឋអាមេរិកទេ បន្ទាប់ពីបានចំណាយកាលពីរដូវកាលមុនក្នុងលក្ខខណ្ឌខ្ចីជើងជាមួយ Strasbourg ។

សមាជិកក្រុម Chelsea ដែលនឹងទៅលេងកម្មវិធីក្លឹបបាល់ទាត់ពិភពលោក

អ្នកចាំទី៖ Robert Sanchez, Filip Jorgensen, Mike Penders, Gaga Slonina ។

ខ្សែការពារ៖ Marc Cucurella, Tosin Adarabioyo, Benoit Badiashile, Levi Colwill, Mamadou Sarr, Moises Caicedo, Trevoh Chalobah, Reece James, Malo Gusto, Aaron Anselmino, Josh Acheampong ។

ខ្សែបម្រើ៖ Pedro Neto, Enzo Fernandez, Cole Palmer, Noni Madueke, Dario Essugo, Andrey Santos, Kiernan Dewsbury-Hall, Romeo Lavia ។

ខ្សែប្រយុទ្ធ៖ Liam Delap, Nicolas Jackson, Christopher Nkunku, Tyrique George, Marc Guiu ។