ខេត្តកំពង់ស្ពឺ៖ ក្រោយទទួលបានបណ្ដឹងពីជនរងគ្រោះឈ្មោះ ឆៃ ណាសីហា ភេទប្រុស អាយុ២០ឆ្នាំ នៅភូមិអង្គសេរី ឃុំជើងរាស់ ស្រុកសាមគ្គីមនីជ័យ ករណីប្លន់ម៉ូតូ ម៉ាកPOPZ ព័ណ៌ទឹកប្រាក់ ពាក់ផ្លាកលេខ កំពង់ស្ពឺ 1AA-4800 នៅផ្លូវលេខ១៤០ ចំណុចសាលាបឋមអង្គជ្រៃ ស្ថិតនៅភូមិទន្លេកន្ទិល ឃុំសំរោងទង ស្រុកសំរោងទង ខេត្ដកំពង់ស្ពឺ ។
ដោយបានការអនុញ្ញាតនិងការដឹកនាំបញ្ជាពី លោកឧត្ដមសេនីយ៍ទោ ឃឹម សុកខៃ ស្នងការ នៃស្នងការដ្ឋាននគរបាលខេត្តកំពង់ស្ពឺ នៅថ្ងៃទី ១៩ ខែមិថុនា ឆ្នាំ២០២៥ កម្លាំងនគរបាលស្រុក បានកិច្ចសហការពីកំលាំងការិយាល័យព្រហ្មទណ្ឌកំរិតស្រាលស្រាវជ្រាវរហូតឈានទៅកំណត់បានមុខសញ្ញានិងឃាត់ជនសង្ស័យ ចំនួន ៨នាក់ ៖
១-ឈ្មោះ អាន ម៉ានាវ ភេទប្រុស អាយុ១៦ឆ្នាំ នៅភូមិត្រគៀត ឃុំត្រពាំងគង (អ្នកបើកម៉ូតូ)
២/ឈ្មោះ វៃ វិរៈ ហៅវ៉ា ភេទប្រុស អាយុ១៧ឆ្នាំ ភូមិអង្គជា ឃុំសំរោងទង (អ្នកកាន់ដាវ)
៣/ឈ្មោះ ទិ បញ្ញា ភេទប្រុស អាយុ១៦ឆ្នាំ ភូមិត្រពាំងលែង ឃុំសំរោងទង (អ្នកបើកម៉ូតូ)
៤/ឈ្មោះ ពែល រ៉ាយុទ្ធ ភេទប្រុស អាយុ១៨ឆ្នាំ ភូមិត្រពាំងលែង ឃុំសំរោង ទង (បក្ខពួក)
៥/ឈ្មោះ ឡយ ចាន់សុភី ភេទប្រុស អាយុ១៦ឆ្នាំ ភូមិអង្គជា ឃុំសំរោងទង (កាន់កាំបិតផ្គាក់)
៦/ឈ្មោះ សុខ ភារៈ ហៅគ្រិត ភេទប្រុស អាយុ១៧ឆ្នាំ ភូមិដែកភ្លើង ឃុំរលាំងគ្រើល (ជិះម៉ូតូជនរងគ្រោះ)
៧/ឈ្មោះ សន ឧត្តម ភេទប្រុស អាយុ១៨ឆ្នាំ ភូមិសំរោងទងកណ្តាល ឃុំសំរោងទង (បក្ខពួក)
៨/ឈ្មោះ អាត ប៊ុនស័ក្ត ភេទប្រុស អាយុ១៧ឆ្នាំ ភូមិក្រាំងស្ពឺ ឃុំរលាំងចក (បក្ខពួក)
តាមការបញ្ជាក់ពីលោកវរសេនីយ៍ឯក ឃុត សុផល អធិការនគរបាលស្រុកសំរោងទង ឱ្យដឹងថាសមត្ថកិច្ចធ្វើការដកហូតបានវត្ថុតាងម៉ូតូ៣គ្រឿងរបស់ជនសង្ស័យជិះធ្វើសកម្មភាព ០២គ្រឿងនិងម៉ូតូម៉ាក POPZ របស់ជនរងគ្រោះ ។
ប្រតិបត្តិការ ២៥ម៉ោង សមត្ថកិច្ចបំបែកបានសំណុំរឿងករណីប្លន់ម៉ូតូឃាត់ខ្លួនបក្ខពួកជនសង្ស័យទាំងអស់ ៨នាក់ កសាងសំណុំរឿងបញ្ជូនទៅការិយាល័យជំនាញ នៃស្នងការដ្ឋាននគរបាលខេត្តកំពង់ស្ពឺ ចំណាត់ការនីតិវិធីបន្ដ៕
