ខេត្តកំពង់ស្ពឺ៖ នគរបាលស្រុកសំរោងទងបានធ្វើការបង្ក្រាបទៅលើមុខសញ្ញាជួញដូរនិងចែកចាយគ្រឿងញៀនជាមុខសញ្ញាចាស់ក្រោមការតាមដានរបស់សមត្ថកិច្ច ទើបឈានដល់ការឃាត់ខ្លួននិងចាប់យកថ្នាំញៀនមួយចំនួន។

ការឃាត់ខ្លួននេះធ្វើឡើងកាលពីវេលាម៉ោង១រសៀលថ្ងៃទី២៨ ខែសីហា ឆ្នាំ២០១៦ នៅចំណុចក្នុងវត្តរលាំងឈូក ស្ថិតនៅភូមិទំពូង ឃុំកាហែង ស្រុកសំរោងទង ខេត្តកំពង់ស្ពឺ។ មុខសញ្ញាជួញដូរគ្រឿងញៀនដែលឃាត់ខ្លួនឈ្មោះវ៉ង់ វុធ ភេទប្រុស អាយុ៣០ឆ្នាំ នៅភូមិត្រពាំងជ្រៅ ឃុំកាហែង ស្រុកសំរោងទង ខេត្តកំពង់ស្ពឺ។

លោកវរសេនីយ៍ទោ ឃុត សុផល អធិការនគរបាលឲ្យដឹងថា កម្លាំងចំនាញស្រុកសហការជាមួយកម្លាំងផ្នែកប្រឆាំងគ្រឿងញៀនខេត្ត បានបើកប្រតិបត្តិការបង្ក្រាបទៅលើជនសង្ស័យជាមុខសញ្ញាជួញដូរនិងចែកចាយគ្រឿងញៀនដ៏សកម្មដែលសមត្ថកិច្ចធ្វើការតាមដានជាយូរមកហើយ ខណៈជននេះកំពុងធ្វើសកម្មភាព។

លោកអធិការបន្តថា ក្រោយឃាត់ខ្លួនសមត្ថកិច្ចចាប់យកវត្ថុតាង ក្រាមពណ៌ស សង្ស័យគ្រឿងញៀន ចំនួន០៤កញ្ចប់តូច ម៉ូតូ០១គ្រឿង ម៉ាកគុបជ្រុង ពណ៌ទឹកប្រាក់ គ្មានផ្លាកលេខ និងទូរស័ព្ទដៃ០១គ្រឿងម៉ាកខេមហ្វូនពណ៌ខ្មៅ ។

លោកអធិការឲ្យដឹងទៀតថា ការបង្ក្រាបគ្រឿងញៀននេះគឺកម្លាំងរបស់លោកនឹងបន្តធ្វើដូចភ្លៀងរលឹមដើម្បីសុវត្ថិភាពប្រជាពលរដ្ឋក្នុងមូលដ្ឋានក៏ដូចជាចូលរួមទប់ស្កាត់កុំឲ្យកើតមានបទល្មើសផ្សេងៗក្នុងមូលដ្ឋាន។

ករណីនេះកម្លាំងសមត្ថកិច្ចបានកសាងសំណុំរឿងបញ្ជូនទៅការិយាល័យជំនាញដើម្បីចាត់ការតាមនីតិវិធី៕

ដោយ៖ សេនាស័ក្តិ