ភ្នំពេញ៖ ជនសង្ស័យ២នាក់ជាមុខសញ្ញាជួញដូរគ្រឿងញៀនត្រូវបានកម្លាំងអធិការដ្ឋាននគរបាលខណ្ឌសែនសុខធ្វើការបង្ក្រាបនិងឃាត់ខ្លួនរួមជាមួយថ្នាំញៀនចំនួន៦កញ្ចប់ថង់តូច និងឧបកណ៍ប្រើប្រាស់មួយចំនួន។
ករណីបង្ក្រាបនេះបានធ្វើឡើងកាលពីវេលាម៉ោង១០ និង៣០នាទីព្រឹកថ្ងៃទី២៨ ខែសីហា ឆ្នាំ២០១៦ នៅចំណុចបន្ទប់ជួលលេខ១៦ក ជាន់ទី១ ផ្លូវលំភូមិទឹកថ្លា សង្កាត់ទឹកថ្លា ខណ្ឌសែនសុខ។
ក្នុងប្រតិបត្តិការចុះបង្ក្រាបនេះដឹកនាំដោយលោកវរៈសេនីយ៍ឯក ម៉ក់ ហុង អធិការខណ្ឌសែនសុខ លោកវរៈសេនីយ៍ត្រី គួក សុខហួរ អធិការរងនគរបាលខណ្ឌ រួមជាមួយកម្លាំងនគរបាលប៉ុស្តិ៍ទឹកថ្លាជាច្រើនរូបទៀត។
ជនសង្ស័យទាំង២នាក់ដែលឃាត់ទី១មានឈ្មោះតែម ប៉ូរ៉ា ភេទប្រុសអាយុ២២ឆ្នាំ មុខរបរជាងដែកស្នាក់នៅបន្ទប់ជួលកេខ១៦កជាន់ទី១ផ្លូវលំភូមិទឹកថ្លាសង្កាត់ទឹកថ្លា ខណ្ឌសែនសុខនិងមានស្រុកកំណើតភូមិអង្កាញ់ឃុំប្រធាតុស្រុកកំពង់ត្របែកខេត្តព្រៃវែង និងទី២មានឈ្មោះ យ៉ាំ សុភា ភេទប្រុស អាយុ៣៨ឆ្នាំ មុខរបរមិនពិតប្រាកដស្នាក់នៅបន្ទប់ជួលលេខ១៦កជាន់ទី១ ផ្លូវលំភូមិទឹកថ្លា សង្កាត់ទឹកថ្លា ខណ្ឌសែនសុខ និងមានស្រុកកំណើតភូមិកក់ឃុំកក់ស្រុកពញាក្រែកខេត្តកំពង់ចាម។
លោកវរៈសេនីយ៍ឯក ម៉ក់ ហុង អធិការនគរបាលខណ្ឌ បានប្រាប់ឲ្យដឹងថា មុនឈានទៅបង្ក្រាបមុខសញ្ញាខាងលើគឺសមត្ថកិច្ចបានប្រើប្រាស់វិធានការណ៍ជំនាញចុះស៊ើបអង្កេតនិងស្រាវជ្រាវទើបឈានដល់ការឃាត់ខ្លួនបានជនសង្ស័យទាំង២នាក់ដល់បន្ទប់ជួលជាក់ស្តែងតែម្តង ហើយជាលទ្ធផលចាប់យកវត្ថុតាងបាន ថ្នាំញៀនប្រភេទក្រាមសថ្លា ចំនួន៦កូនថង់តូច និងថ្នាំគ្រាប់ពណ៌ផ្ការឈូក ចំនួន៥ចំណិតតូច ឧបករណ៍ប្រើប្រាស់គ្រឿងញៀនមួយចំនួន និងដាវសាមូរ៉ៃ ១ដើម។
បច្ចុប្បន្នជនសង្ស័យទាំង២នាក់ខាងលើកំពុងឃាត់ខ្លួននិងធ្វើការសាកសួរនៅអធិការដ្ឋាននគរបាលខណ្ឌសែនសុខដើម្បីកសាងសំណុំរឿងបញ្ជូនទៅតុលាការចាត់ការបន្តតាមនីតិវិធី៕
ដោយ៖ តុង សីហា
