ភ្នំពេញ÷ក្រោយមានការផ្សព្វផ្សាយព័ត៌មានករណីជន បរទេស០១នាក់ បោះក្រដាសពីលើអគារ១កន្លែងធ្លាក់ ចុះមកក្រោមដី ដែលសរសេរអក្សរអង់គ្លេស «police room 901 police» ក្នុងសង្កាត់ទួលទំពូង១ ខណ្ឌ ចំការមន នារសៀលថ្ងៃទី២៧ ខែមិថុនា ឆ្នាំ២០២៥ ដែលបង្កឲ្យមានការភ្ញាក់ផ្អើលដោយនាំគ្នាសង្ស័យក្រែងមានបញ្ហាបទល្មើសអ្វីមួយកើតឡើងចំពោះជនបរទេសនោះ។
បន្ទាប់ពីទទួលបានព័ត៌មានភ្លាម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បញ្ជាទៅកម្លាំងជំនាញអធិការដ្ឋាននគរបាលខណ្ឌចំការមន សហការជាមូយកម្លាំងការិយាល័យនគរបាលប្រឆាំងគ្រឿងញៀន បានចុះទៅដល់ទីតាំងខាងលើ ហើយធ្វើការស្រាវជ្រាវ ពិនិត្យឃើញមានជន បរទេស០១នាក់ មានឈ្មោះ MCARDLE STEVEN KING ភេទប្រុស អាយុ55ឆ្នាំ ជនជាតិអង់គ្លេស កាន់លិខិតឆ្លងដែនលេខ147508728 ជាជនប្រេីប្រាស់សារធាតុញៀន វង្វេងស្មារតី និងអុកឡុក នៅចំណុចសណ្ឋាគារ COLINA INN HOTEL អគារលេខ26 បន្ទប់លេខ901 ជាន់ទី9 ផ្លូវ123 កែង440 សង្កាត់ទួលទំពូងទី1 ខណ្ឌចំការមន ហើយជាអ្នកបោះក្រដាសនោះចុះមកក្រោម។
បច្ចុប្បន្នជនបរទេសនេះ សមត្ថកិច្ចជំនាញអធិការដ្ឋាននគរបាលខណ្ឌចំការមន បាននាំយកមកអនុវត្តតាមនីតិវិធី៕
