ខេត្តកោះកុង៖ យោងតាមប្រភពព័ត៌មានពីមន្ត្រី នៃមន្ទីរព័ត៌មានប្រចាំការនៅច្រកព្រំដែនអន្តរជាតិចាំយាមស្ថានភាពច្រកអន្តរជាតិចាំយាមខេត្តកោះកុង នៅព្រឹកថ្ងៃទី ៣០ ខែមិថុនា ឆ្នាំ ២០២៥ បានឱ្យដឹងថា ច្រកទ្វារអន្តរជាតិ ហាតលេក ស្រុកខ្លងងយ៉ៃ ខេត្តត្រាត នៅបន្តបិទជាឯកតោភាគី ។
ចំណែកឯខាងភាគីកម្ពុជា ច្រកព្រំដែនអន្តរជាតិចាំយាម នៅតែអនុវត្តតាមគោលការណ៍របស់រាជរដ្ឋាភិបាល គឺមិនអនុញ្ញាតឲ្យមានការនាំចូលនូវទំនិញគ្រប់ប្រភេទមកកម្ពុជាឡើយ។ ប៉ុន្តែភាគីទាំងពីរបានសម្របសម្រួលឲ្យមានការចាកចេញពីប្រទេសនូបប្រជាពលរដ្ឋ ពលកររៀងៗខ្លួន។ ក្រុមការងាររបស់រដ្ឋបាលខេត្តកោះកុងនៅតែបន្តទទួលពលករខ្មែរ និងសម្របសម្រួលដឹកជញ្ជូនទៅកាន់មណ្ឌលសុវត្ថិភាព ព្រមទាំងផ្ដល់ការងារដល់ពលករណាដែលមានបំណងចង់បម្រើការងារនិងរោងចក្រនៅក្នុងខេត្តកោះកុង។
ក្រុមការងារនៃមន្ទីរសុខាភិបាលខេត្តកោះកុង នៅរង់ចាំពិនិត្យសុខភាពជូនពលករដែលបានចាកចេញពីប្រទេសថៃ ដោយមានការយកចិត្តទុកដាក់ខ្ពស់។ ស្ថានភាពសន្តិសុខ មានភាពស្ងប់ស្ងាត់ គ្មានអ្វីកើតឡើងគួរឲ្យកត់សម្គាល់នោះទេ៕
ដោយ៖តារា
