ភ្នំពេញ៖ នារីម្នាក់ចេញពីខួបកំណើតមិត្តភក្តិត្រូវបានក្រុមជនសង្ស័យមានគ្នា៤នាក់ប្រដាប់ដោយដាវសាមូរ៉ៃគំរាមកាប់ប្លន់យកទូរស័ព្ទនិងគ្រឿងអលង្ហការមួយចំនួន កាលពីវេលាម៉ោង២យប់ថ្ងៃទី៣០ ខែសីហា ឆ្នាំ២០១៦ នៅតាមបណ្តោយផ្លូវឧកញ៉ាម៉ុងរិទ្ធី ស្ថិតក្នុងសង្កាត់ទួលសង្កែ ខណ្ឌឫស្សីកែវ ។ ភ្លាមនោះត្រូវបានកម្លាំងសមត្ថកិច្ចល្បាតឃើញទាន់ក៏ប្រដេញតាមចាប់បាន២នាក់និងម៉ូតូមួយគ្រឿង ដាវ១ដើម ចំណែកបក្ខពួករត់គេចខ្លួនបាត់។ ក្រោយមកសត្ថកិច្ចក៏បន្តតាមចាប់បក្ខពួកចំនួន១៣នាក់ទៀតក្នុងនោះមានស្រី៤នាក់។
ជនសង្ស័យដែលឃាត់ខ្លួនបានដំបូងឈ្មោះខុន សុខជាតិ ភេទប្រុស អាយុ១៨ឆ្នាំ មុខរបរនិងទីលំនៅមិនពិតប្រាកដ ទី២ឈ្មោះសិទ្ធ មុខរបរនិងទីលំនៅមិនពិតប្រាកដ។ ចាប់យកដាវសាមូរ៉ៃ១ដើម និងម៉ូតូមួយគ្រឿងម៉ាកហុងដាឌ្រីម ស៊េរី២០១២ ពណ៌ខ្មៅ ពាក់ស្លាកលេខភ្នំពេញ1FJ-9593 ។
ជនរងគ្រោះសុំមិនបញ្ចេញឈ្មោះបានរៀបរាប់ថា នៅមុនពេលកើតហេតុរូបបានចេញពីខួបកំណើតមិត្តភក្តិនៅក្លឹបម៉ារិន បន្ទាប់ចប់កម្មវិធីរួចនាងបានជិះម៉ូតូធូដេមួយគ្រឿងធ្វើដំណើរត្រលប់មកផ្ទះវិញ ខណៈមកដល់ចំណុចមុខរោងចក្រមួយកន្លែងតាមបណ្តោយផ្លូវឧកញ៉ាម៉ុងរិទ្ធីរូបនាងបានឈប់ម៉ូតូនិយាយទូរស័ព្ទ។ ភ្លាមនោះស្រាប់តែជនសង្ស័យមានគ្នា៤នាក់ជិះម៉ូតូ២គ្រឿងប្រដាប់ដោយដាវសាមូរ៉ៃគំរាមកាប់ប្លន់យកទូរស័ព្ទអាហ្វូនមួយគ្រឿង Nokia ចុចពិល១គ្រឿង ថែមទាំងខ្សែ.កមួយខ្សែទៀតរួចគេចខ្លួនបាត់។
សមត្ថកិច្ចបានឲ្យដឹងថា ដោយសារតែមានករណីប្លន់នៅក្នុងភូមិសាស្ត្រញឹកញាប់ពេកទើបកម្លាំងល្បាតចុះល្បាតចាំមើលបន្ទាប់មកស្រាប់តែឃើញជនសង្ស័យមានគ្នា២នាក់ជិះម៉ូតូ១គ្រឿងដោយមានការសង្ស័យ ទើបបើករថយន្តតាមមើល។ ភ្លាមនោះជនសង្ស័យក៏បានដកដាវបម្រុងកាប់ជនរងគ្រោះហើយគំរាមយកទូរស័ព្ទដោយឃើញដូច្នេះ សមត្ថកិច្ចបានបើករថយន្តបំបុកធ្វើឲ្យជនសង្ស័យដួលម៉ូតូទើបចាប់បាន២នាក់តែម្តង។
សមត្ថកិច្ចបានបន្តថា បន្ទាប់ពីចាប់បានជនសង្ស័យទាំង២នាក់រួចក៏បន្តទៅតាមចាប់បក្ខពួកទៀតនៅចំណុចដីឡូត៍មួយកន្លែងជិតនិងរង្វង់មូលកាំកូ ឃាត់បានជនសង្ស័យ១៣នាក់ទៀត ក្នុងនោះមានស្រី៤នាក់ផងដែរ រួចសមត្ថកិច្ចចាប់យករថយន្តឡង់គ្រីស័រ១គ្រឿង ពណ៌ខ្មៅ ពាក់ស្លាកលេខភ្នំពេញ2F-5777 រួមទាំងដាវដែលនៅក្នុងរថយន្តនោះជាង១០ដើមទៀត។
ក្រោយមកជនសង្ស័យទាំងអស់ត្រូវបាននាំខ្លួនទៅប៉ុស្តិ៍នគរបាលទួលសង្កែ ដើម្បីកសាងសំណុំរឿងបញ្ជូនទៅអធិការដ្ឋាននគរបាលខណ្ឌឫស្សីកែវចាត់ការបន្ត៕
ដោយ៖ ព្រែកជ័យ
