ភ្នំពេញ៖ គ្រោះថ្នាក់ចរាចរណ៍បង្កឡើងដោយសារតែបុរសម្នាក់បើករថយន្តកូរ៉ូឡាលឿនរេចង្កូតបុករះម៉ូតួចតស្ងៀម២គ្រឿងបណ្តាលឲ្យក្មេងៗតូច៣នាក់រងរបួសធ្ងន់ស្រាល ខណៈកំពុងអង្គុយលេងក្បែរនោះ។

ករណីនេះបានកើតឡើងកាលពីវេលាម៉ោង៩ និង៣០យប់ ថ្ងៃទី២៩ ខែសីហា ឆ្នាំ២០១៦ នៅចំណុចខាងកើតផ្សារកាណាសីុធី តាមបណ្តោយផ្លូវបេតុង ភូមិចោមចៅ សង្កាត់ចោមចៅ ខណ្ឌពោធិ៍សែនជ័យ។

តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុក្មេងៗ៣នាក់ក្នុងនោះមានស្រីម្នាក់បានរត់និងអង្គុយលេងនៅខាងមុខតូបម្តាយរបស់គេលក់ បន្ទាប់មកស្រាប់តែមានរថយន្តមួយគ្រឿងម៉ាកកូរ៉ូឡា ពណ៌ទឹកប្រាក់ ពាក់ស្លាកលេខភ្នំពេញ2A-0011 បើកបរដោយបុរសម្នាក់ និងមានមនុស្សប្រុស២នាក់ទៀតរួមដំណើរជាមួយធ្វើដំណើរតាមបណ្តោយផ្លូវបេតុងក្នុងទិសដៅពីជើងទៅត្បូង ហើយបានរេចង្កូតទៅបុករះម៉ូតូឌ្រីមសង់២គ្រឿងដែលកំពុងចងស្ងៀមនៅខាងមុខតូបលក់ចាប់ហូយនិងបុកក្មេងតូចៗដែលអង្គុយលេងនៅទីនោះបណ្តាលឲ្យយក្មេងស្រីម្នាក់ចូលក្រោមរថយន្តរងរបួសធ្ងន់ ចំណែកក្មេងប្រុស២នាក់ទៀតខ្ទាតចេញពីម៉ូតូ ហើយរថយន្តគល់ជាប់ទៅមុខលែងរួច។

ក្រោយកើតហេតុម្ចាស់រថយន្តបង្កបានចុះពីលើរថយន្តគេចខ្លួនបាត់ដោយទុករថយន្តនៅកន្លែងកើតហេតុ។ លុះមួយសន្ទុះក្រោយមកទើបមានបុរសម្នាក់ចេញមុខតំណាងឲ្យម្ចាស់រថយន្តមកធានាចរចាជាមួយម្តាយក្មេងរងគ្រោះដោយព្រមចេញថ្លៃព្យាបាលជំងឺដើម្បីបញ្ចប់រឿងនៅកន្លែងកើតហេតុ៕

ដោយ៖ សុខាសែនជ័យ