ប្រជាជនទីក្រុងប៉ារីសនឹងអាចហែលទឹកនៅទន្លេSeine ចាប់ពីថ្ងៃទី 5 ខែកក្កដា បន្ទាប់ពីជាងមួយសតវត្សនៃការហាមឃាត់ដោយសារតែការបំពុលទឹក។

រដ្ឋាភិបាលទីក្រុងប៉ារីសបានប្រកាសថា សកម្មភាពហែលទឹកនៅទន្លេ Seine នឹងត្រូវបានបើកឡើងវិញចាប់ពីថ្ងៃទី 5 ខែកក្កដាជាមួយនឹងកន្លែងហែលទឹកសំខាន់ៗចំនួន 3 នៅកណ្តាលទីក្រុង។ ទីតាំងទាំងនេះអាចផ្ទុកមនុស្សបានច្រើនជាង 1,000 នាក់ក្នុងមួយថ្ងៃ ហើយនឹងនៅតែបើករហូតដល់ចុងខែសីហា។
ការសម្រេចចិត្តនេះជាលើកដំបូងក្នុងរយៈពេលជាង 100 ឆ្នាំដែលមនុស្សត្រូវបានអនុញ្ញាតឱ្យហែលទឹកក្នុងទន្លេសែន នៅចំកណ្តាលរដ្ឋធានីបារាំង។ មនុស្សជាច្រើនបានសម្ដែងការរំភើបចិត្តរបស់ខ្លួន។ Marc Peignon បុគ្គលិកផ្នែកកែសម្ផស្សបាននិយាយថា “ខ្ញុំនឹងទៅហែលទឹកនៅ Seine នៅថ្ងៃចន្ទ” ។ ជាមួយគ្នានេះដែរ Ariana Fracalossi ដែលជាបណ្ណារក្ស បាននិយាយថា នាងពិតជារំភើបខ្លាំងណាស់ ព្រោះកន្លែងធ្វើការរបស់នាងនៅជិតកន្លែងហែលទឹក។
ទោះជាយ៉ាងណាក៏ដោយ មិនមែនគ្រប់គ្នាត្រៀមខ្លួនរួចជាស្រេចដើម្បីលោតចូលទៅក្នុងទន្លេដែលត្រូវបានកែលម្អថ្មីនោះទេ។ អ្នកទេសចរម្នាក់មកពីសហរដ្ឋអាមេរិកបាននិយាយដោយត្រង់ថា “ខ្ញុំនឹងជ្រលក់ម្រាមជើងរបស់ខ្ញុំប៉ុណ្ណោះ” ។ ស្ត្រីជនជាតិបារាំងម្នាក់ដែលរស់នៅសហរដ្ឋអាមេរិកបាននិយាយមិនដាច់ពីមាត់ថា៖ «ទេ ខ្ញុំច្បាស់ជាមិនចូលទឹកទេ»។
ការត្រលប់មកហែលទឹកវិញគឺជាលទ្ធផលនៃគម្រោងកែលម្អគុណភាពទឹកនៃទន្លេ Seine សម្រាប់កីឡាអូឡាំពិកទីក្រុងប៉ារីសឆ្នាំ 2024 ។ យោងតាមលោក Pierre Rabadan អភិបាលរងក្រុងប៉ារីស ទទួលបន្ទុកតំបន់ Seine នេះគឺជា “គម្រោងដ៏ធំ និងស្មុគស្មាញ ដែលត្រូវតែបញ្ចប់ក្នុងរយៈពេលដ៏ខ្លី”។
ប្រជាពលរដ្ឋរាប់ម៉ឺនគ្រួសារត្រូវបានតភ្ជាប់ប្រព័ន្ធលូ រោងចក្រប្រព្រឹត្តិកម្មទឹកសំណល់ត្រូវបានធ្វើឱ្យប្រសើរឡើង ហើយអាងស្តុកទឹកព្យុះត្រូវបានសាងសង់ដើម្បីកាត់បន្ថយហានិភ័យនៃការបំពុលនៅពេលមានភ្លៀងធ្លាក់ខ្លាំង។ ចាប់តាំងពីរដូវក្តៅមុន ទោះបីជាព្រឹត្តិការណ៍អូឡាំពិកមួយចំនួនត្រូវបានរងផលប៉ះពាល់ដោយអាកាសធាតុក៏ដោយ ក៏ការប្រកួតនៅលើទន្លេ Seine បានប្រព្រឹត្តទៅដោយរលូន ដែលរួមចំណែកដល់ការពង្រឹងទំនុកចិត្តលើគុណភាពទឹក។
ក្នុងរដូវហែលទឹកនេះ ទឹកទន្លេនឹងត្រូវធ្វើតេស្តជារៀងរាល់ថ្ងៃ។ តំបន់ហែលទឹកនឹងត្រូវបានដាក់ទង់ពណ៌បៃតង ឬក្រហម ស្រដៀងនឹងប្រព័ន្ធព្រមាននៅតាមឆ្នេរ ដើម្បីបង្ហាញពីកម្រិតសុវត្ថិភាព។ លោក រ៉ាបាដាន អះអាងថា៖ «ប្រសិនបើការហែលទឹកត្រូវបានអនុញ្ញាត វាមានន័យថាទឹកពិតជាមានសុវត្ថិភាព។
បន្ថែមពីលើកន្លែងហែលទឹកទាំងបីនៅក្នុងទីក្រុងប៉ារីស មានទីតាំងចំនួន 14 ផ្សេងទៀតដែលបើកនៅតាមបណ្តោយទន្លេ Seine និង Marne រួមទាំងកន្លែងពីរនៅជាយក្រុងដែលបានបើកតាំងពីខែមិថុនា៕ ដោយធីរីណា

រូបថត​: AFP