សេដ្ឋកិច្ច៖ បើតាមទីភ្នាក់ងារសារព័ត៌មានរ៉យទ័រ (Reuters) បានចុះផ្សាយថា តម្លៃប្រេងអន្តរជាតិ បានកើនឡើងជាង ២ ភាគរយ នៅថ្ងៃសុក្រទី១១ ខែកក្កដាម្សិលមិញនេះ ដែលជាថ្ងៃបញ្ចប់ការជួញដូរប្រចាំសប្ដាហ៍ ក្រោយទីភ្នាក់ងារថាមពលអន្តរជាតិ (IEA) បាននិយាយថា ទីផ្សារប្រេងតឹងតែងដោយតម្រូវការមានភាពរឹងមាំ ខណៈវិនិយោគិនបន្តឃ្លាំមើលពីពន្ធគយ និងលទ្ធភាពនៃការដាក់ទណ្ឌកម្មថ្មីលើប្រេងរុស្ស៊ីរបស់សហរដ្ឋអាមេរិក។
តម្លៃប្រេងឆៅនាពេលអនាគត ម៉ាក Brent បានកើនឡើង ១,៧១ ដុល្លារ ឬ ២,៥ ភាគរយ ដោយបិទការជួញដូរនៅតម្លៃ ៧០,៣៦ ដុល្លារ/បារ៉ែល។ ប្រេងឆៅអាមេរិក ម៉ាក West Texas Intermediate (WTI) វិញ បានកើនឡើង ១,៨៨ ដុល្លារ ឬ ២,៨ ភាគរយ ដោយបិទការជួញដូរនៅតម្លៃ ៦៨,៤៥ ដុល្លារ/បារ៉ែល។
ក្នុងអត្រាប្រចាំសប្ដាហ៍ តម្លៃប្រេង ម៉ាក Brent បានកើនឡើង ៣ ភាគរយ ខណៈ WTI បានកើនឡើង ២,២ ភាគរយ។
គួរបញ្ជាក់ថា កំណើនតម្លៃប្រេងនៅថ្ងៃសុក្រ កើតឡើងក្រោយ IEA បាននិយាយថា ការផ្គត់ផ្គង់ប្រេងពិភពលោកអាចទាបជាងការរំពឹងទុក ដោយសារតម្រូវការសម្រាប់ការធ្វើដំណើរ និងផលិតកម្មអគ្គិសនីនៅរដូវក្តៅ ធ្វើឱ្យការប្រើប្រាស់ប្រេងខ្ពស់។ កំណើនក៏ជំរុញផងដែរ ដោយលទ្ធភាពនៃការដាក់ទណ្ឌកម្មថ្មីលើប្រេងរុស្ស៊ី ជុំវិញការឈ្លានពានអ៊ុយក្រែន។ យ៉ាងណាមិញ កំណើនតម្លៃនៅតែមានកំណត់ ដោយសារតែការព្រួយបារម្ភដែលថា ពន្ធខ្ពស់របស់លោក ដូណាល់ ត្រាំ ធ្វើឱ្យប៉ះពាល់ដល់សេដ្ឋកិច្ចសកល ហើយទម្លាក់តម្រូវការប្រេង៕
ដោយ៖តារា
