ខេត្តស្ទឹងត្រែង៖ រថយន្តសាំងយ៉ុង១គ្រឿងដឹកអ្នកដំណើរបើកក្នុងល្បឿនលឿនដូចហោះ បានពន្លះជាមួយម៉ូតូបណ្តាលឲ្យរងរបួសធ្ងន់ចំនួន២នាក់ ករណីគ្រោះថ្នាក់ចរាចរណ៍នេះនៅចំណុចផ្លូវប្រសព្វស្ថិតនៅភូមិត្រពាំងព្រីង សង្កាត់-ក្រុង-ខេត្តស្ទឹងត្រែង កាលពីវេលម៉ោង៨និង៣៥នាទីព្រឹកថ្ងៃទី៣០ ខែសីហា ឆ្នាំ២០១៦ ។
ប្រភពព័ត៌មានពីកន្លែងកើតហេតុឲ្យដឹងថា មុនកើតហេតុគេឃើញរថយន្តសាំងយ៉ុងដឹកអ្នកដំណើរ១គ្រឿង ពណ៌ស្លែ ពាក់ស្លាក់លេខ ពោធិ៍សាត់ 2A-1011 បានបើកពីលិចទៅកើតក្នុងល្បឿនលឿនដូចហោះ មកដល់ចំណុចកើត
ហេតុក៏វាក់ជាមួយម៉ូតូឌ្រីម សង់សេ១២៥ សេរី២០១៤ មួយគ្រឿងពណ៌ខ្មៅ ពាក់ស្លាក់លេខ ភ្នំពេញ 1CC-8025 បានបើកពីជើងទៅត្បូង មកដល់ចំណុចផ្លូវប្រសព្វក៏វាក់គ្នាជាមួយរថយន្តសាំងយ៉ុង ក៏ជ្រុលទៅបុកម៉ូតូពេញទំហឹងបណ្តាលឲ្យប្តីប្រពន្ធ២នាក់ខាងលើនោះរងរបួសធ្ងន់។ ប្តីបែកក្បាល និងខូចជើងខាងឆ្វេង មានឈ្មោះ កន នឿន ភេទប្រុស អាយុ៦២ឆ្នាំ ចំណែកឯប្រពន្ធរងរបួសបាក់ភ្លៅខាងស្តាំមានឈ្មោះ ហឺយ យឿម ភេទស្រី អាយុ៦២ឆ្នាំ រស់នៅភូមិ-ឃំុកើតហេតុខាងលើនោះ រួចបានដឹកយកប្រពន្ធទៅសង្រ្គោះនៅមន្ទីរពេទ្យយោធាភូមិភាគ១ ហើយប្តីយកទៅសង្គ្រោះនៅមន្ទីរពេទ្យបង្អែកខេត្តស្ទឹងត្រែង ។
បច្ចុប្បន្នរថយន្តបង្កនិងម៉ូតូជនរងគ្រោះខាងលើក្រោយពីធ្វើការវាស់វែងរួចរាល់ហើយក៏បាននាំយកទៅរក្សាទុកនៅឯស្នងការរដ្ឋាននគរបាលខេត្តស្ទឹងត្រែង ដើម្បីឲ្យម្ចាស់រថយន្តនិងជនរងគ្រោះចូលមកដោះស្រាយគ្នានៅពេលក្រោយតាមផ្លូវច្បាប់ ។
គួរបញ្ជាក់ផងដែរថា តៃកុងរថយន្តដែលជាអ្នកបង្កករណីគ្រោះថ្នាកចរាចរណ៍ខាងលើនោះនៅក្រោយពេលកើតគឺមិនបានឃើញមុខចេញមកដោះស្រាយនៅនឹងកន្លែងកើតហេតុនោះទេ បែរជារត់គេចខ្លួនបាត់ស្រមោល ៕
ដោយ៖ មាស សុផាត
