ខេត្តមណ្ឌលគិរី៖ បើតាមលោក សៀក មុន្នី អភិបាលស្រុកអូររាំង បានឱ្យដឹងនៅថ្ងៃទី១២ ខែកក្កដា ឆ្នាំ២០២៥នេះថា៖ “កង្ហារអគ្គិសនីដើរដោយថាមពលខ្យល់” ខេត្តមណ្ឌលគិរី នឹងទទួលបានសមិទ្ធផលថ្មីមួយទៀត ក្នុងពេលដ៏ខ្លីខាងមុខនេះ ដែលអាចផ្គត់ផ្គង់ថាមពលអគ្គិសនីទាំងក្នុងស្រុក និងអាចតបណ្ដាញទៅផ្គត់ផ្គង់ថាមពលនៅតំបន់ផ្សេងទៀត។
អភិបាលស្រុកអូររាំង ក៏បានរំពឹងថា តាមរយៈគម្រោងនេះក៏អាចនឹងលើកស្ទួយសេដ្ឋកិច្ចជាតិថែមមួយកម្រិតទៀត ជាពិសេសគឺអាចទាក់ទាញទេសចរជាតិ និងអន្តរជាតិ ឱ្យមកលេងកម្សាន្តនៅខេត្តមណ្ឌលគិរី កាន់តែច្រើន។ លោកបន្តថា នាពេលកន្លងទៅ មានក្រុមហ៊ុនចំនួន៦ បានទំនាក់ទំនងសិក្សាសាងសង់អគ្គិសនីដើរដោយថាមពលខ្យល់ (ថាមពលស្អាត) ក្នុងស្រុកអូររាំងខេត្តមណ្ឌលគិរី។
លោកអភិបាលស្រុករូបនេះ បានឱ្យដឹងទៀតថា បើតាមអ្វីដែលរដ្ឋបាលស្រុកទទួលដំណឹងថ្មីៗនេះ ក្នុងនោះមានក្រុមហ៊ុនចំនួន២ ដែលគ្រោងនឹងបើកការដ្ឋានសាងសង់ ស្ថានីយអគ្គិសនីដើរដោយថាមពលខ្យល់ផងដែរ គឺស្ថិតក្នុងឃុំសែនមនោរម្យ និងឃុំដាក់ដាំ ស្រុកអូររាំង ខេត្តមណ្ឌលគិរី។
លោកអភិបាលស្រុក បានបញ្ជាក់ថា តាមរយៈគម្រោងនេះក្នុងនាមរដ្ឋបាលស្រុកអូររាំង ពិតជាមានក្តីសោមនស្សណាស់ ដែលទទួលបានគម្រោងសាងសង់ស្ថានីយផលិតកង្ហារអគ្គិសនីដើរដោយថាមពលខ្យល់ នៅលើទឹកដីរបស់ខ្លួន។ ខណៈរំពឹងថា វត្តមានដងកង្ហារដែលមានរយៈកម្ពស់ខ្ពស់នេះ អាចផ្គត់ផ្គង់ថាមពលអគ្គិសនីទូទាំងខេត្តមណ្ឌលគិរី ក៏ដូចជាដល់អ្នកប្រើប្រាស់គ្រប់ប្រភេទនៅគ្រប់ផ្នែកទាំងអស់ នៃព្រះរាជាណាចក្រកម្ពុជាផងដែរ។
លោកអភិបាលស្រុក បានបន្ថែមថា ពេលដែលមានដងកង្ហាអគ្គិសនីដើរដោយថាមពលខ្យល់ បានដំណើការនៅពេលនោះ ក៏អាចទាក់ទាញចំណាប់អារម្មណ៍ភ្ញៀវទេសចរជាតិ-អន្តរជាតិ ឱ្យមកទស្សនាកម្សាន្ត ខេត្តមណ្ឌលគិរី ថែមទៀត នាពេលខាងមុខផងដែរ។
សូមជម្រាបជូនថា ក្រុមប្រឹក្សាអភិវឌ្ឍន៍កម្ពុជា (CDC) នាពេលថ្មីៗកន្លងទៅ បានអនុម័តគម្រោងអភិវឌ្ឍន៍ស្ថានីយផលិតអគ្គិសនី ដើរដោយថាមពលខ្យល់អានុភាព ១៥០មេហ្កាវ៉ាត់ នៅស្រុកអូររាំង ខេត្តមណ្ឌលគិរី ក្នុងទំហំទុនវិនិយោគ ២០៧ លានដុល្លារ និងអាចបង្កើតការងារចំនួន ១៤៥កន្លែង។
គួររម្លឹកថា រដ្ឋសភា កាលពីថ្ងៃទី២២ ខែឧសភាកន្លងទៅ បាននុម័តលើគម្រោងវិនិយោគលើការផលិតថាមពលអគ្គិសនីដើរដោយថាមពលខ្យល់ នៅខេត្តមណ្ឌលគិរី ចំនួន ៦គម្រោងផ្សេងគ្នា ដែលមានអានុភាព សរុបចំនួន ៩០០មេហ្កាវ៉ាត់ ហើយរាជរដ្ឋាភិបាល បានដាក់ផែនការផលិតថាមពលស្អាតឱ្យបាន ៧០% នៅត្រឹមឆ្នាំ២០៣០ ដើម្បីឱ្យការអភិវឌ្ឍមានចេរភាព និងទាក់ទាញ ការវិនិយោគបន្ថែម៕ ដោយ៖តារា
