ភ្នំពេញ៖ ម៉ូតូ២គ្រឿងជិះខ្វះការប្រុងប្រយ័ត្ននៅផ្លូវកែងអក្សរតេ ក៏ជ្រុលទៅបុកគ្នាយ៉ាងពេញទំហឹងបណ្ដាលឲ្យស្ត្រីម្នាក់ស្លាប់នៅកន្លែងកើតហេតុ ចំណែកបុរស២នាក់ទៀតរងរបួសធ្ងន់និងស្រាល ។ ហេតុការណ៍នេះបានកើតឡើងនៅវេលាម៉ោង៥និង១០នាទីព្រឹកថ្ងៃទី១៣ខែកក្កដាឆ្នាំ២០២៥ ជិតវត្តធម្មត្រៃផ្លូវបេតុងអត់លេខកែងផ្លូវ៣០ម៉ែត្រ សង្កាត់ព្រៃស ខណ្ឌដង្កោ រាជធានីភ្នំពេញ ។
សពស្ត្រីរងគ្រោះមានឈ្មោះ កាយ វណ្ណៈ ភេទស្រី អាយុ៣៨ឆ្នាំ មុខរបរលក់ដូរ ស្នាក់នៅភូមិត្រពាំងចក សង្កាត់ព្រៃវែង ខណ្ឌដង្កោ ។
ចំណែកម៉ូតូបង្កហេតុបើកបរដោយឈ្មោះ ហម ស៊ុយ ភេទប្រុស អាយុ៣០ឆ្នាំ មុខរបរកម្មករដឹកជញ្ជូន មានទីលំនៅភូមិបាស្រែ ឃុំបាស្រែ ស្រុកអង្គរបុរី ខេត្តតាកែវ (រងរបួសស្រាល ឃាត់ខ្លួន អត់ពាក់មួកសុវត្តិភាព)។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកេីតហេតុគេបានឃើញប្តីប្រពន្ធ២នាក់បានជិះម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ 1JN-5089 ធ្វើដំណើរតាមបណ្ដោយផ្លូវបេតុងអត់លេខ ក្នុងទិសដៅពីត្បូងទៅជើង លុះមកដល់ចំណុចផ្លូវកែងអក្សរតេ ក៍ស្រាប់តែមានបុរស២នាក់បានជិះម៉ូតូម៉ាកហុងដាឌ្រីមពណ៌ខ្មៅ ពាក់ស្លាកលេខ ភ្នំពេញ 1KG-6046 បោះពួយតាមបណ្ដោយផ្លូវ៣០ម៉ែត្រក្នុងទិសដៅពីលិចទៅកេីតដោយល្បឿនលឿនខ្វះការប្រុងប្រយ័ត្នក៍ជ្រុលទៅបុកម៉ូតូដែលជិះដោយប្តីប្រពន្ធ២នាក់ បណ្ដាលឲ្យដួលខ្ទាតស្ត្រីជាប្រពន្ធផ្ទប់នឹងបង្គោលភ្លើងដែលនៅក្បែរកន្លែងកើតហេតុបោកក្បាលស្លាប់យ៉ាងអាណោចអាធ័ម ។
ដោយឡែកបុរសជាប្តីរងរបួសធ្ងន់គួរសមត្រូវបានដឹកយកទៅសង្គ្រោះនៅមន្ទីរពេទ្យ។ រីឯអ្នកបើកបរដែលបង្កគ្រោះថ្នាក់ត្រូវបានឃាត់ខ្លួនប្រគល់អោយសមត្ថកិច្ច។
ក្រោយកេីតហេតុ សមត្ថកិច្ចបានទាក់ទងទៅសាច់ញាតិ និងបានធ្វើលិខិតប្រគល់សពអោយក្រុមគ្រួសារយកទៅចាត់ចែងធ្វើបុណ្យតាមប្រពៃណីនៅផ្ទះជនរងគ្រោះ។ ចំណែកមធ្យោបាយធ្វើដំណើររួមទាំងអ្នកបេីកម៉ូតូបង្កហេតុត្រូវសមត្ថកិច្ចជំនាញចរាចរណ៍ធ្វើការវាស់វែងយកទៅរក្សាទុកនៅការិយាល័យនគរបាលចរាចរណ៍ផ្លូវគោក ដេីម្បីចាត់ការតាមនីតិវិធី ៕
ដោយ ៖ ភារ៉ា ដង្កោ
