ខេត្តកំពង់ស្ពឺ៖ បុរសជាប្តីត្រូវបានកម្លាំងនគរបាលស្រុកឱរ៉ាល់ធ្វើការឃាត់ខ្លួន ខណៈដែលផឹកស្រាស្រវឹង មក ដល់ផ្ទះវាយប្រពន្ធមួយដៃ ហើយថែមទាំង យកពន្លៀក ចាក់ដៃរបស់ប្រពន្ធបណ្តាលឱ្យរងរបួស ប្រពន្ធទ្រាំមិន បាន ក៏ដាច់ចិត្តដាក់ពាក្យប្តឹងឱ្យនគរបាលឃាត់ខ្លួន។
ហេតុការណ៍ប្តីស្រវឹងវាយនិងចាក់ប្រពន្ធខ្លួនឯងខាងលើនេះបានកើតឡើងកាលពី យប់ថ្ងៃទី១៥ ខែកក្កដា ឆ្នាំ ២០២៥ នៅក្នុងភូមិពោធិមាស ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ។
លោក ប៊ុត ប៊ុនធឿន អធិការនគរបាលស្រុកឱរ៉ាល់បាននិយាយឱ្យដឹងថា កាលពីវេលាម៉ោង២១និង៣០នាទីថ្ងៃទី១៥ ខែកក្កដា ឆ្នាំ២០២៥ នៅចំណុច ភូមិពោធិមាស ឃុំ ត្រពាំងជោ ស្រុកឱរ៉ាល់ ខេត្តកំពង់ស្ពឺ មានករណីអំពើហឹង្សាក្នុងគ្រួសារមួយ កើតឡើងដែល បង្កដោយឈ្មោះ សៀប ថេត ហៅ គួក ភេទ ប្រុស អាយុ ២៨ឆ្នាំរស់នៅភូមិឃុំកើតហេតុខាងលើ ត្រូវជាប្តី បានផឹកស្រាស្រវឹងហើយបាន ធ្វើសកម្មភាព វាយ និងចាក់ទៅលើប្រពន្ធឈ្មោះ មុាំ សៀម ភេទ ស្រី អាយុ៤៤ឆ្នំា រស់នៅផ្ទះជាមួយគ្នា ចំមាត់០១ ដៃ បណ្តាលឱ្យដួល សន្លប់ និង យកពន្លៀកចាក់ ក ដៃខាងស្តាំ បណ្តាលឱ្យ រងរបួសដាច់ស្បែក ចេញឈាមផងដែរ។
លោក ប៊ុត ប៊ុនធឿន អធិការនគរបាលស្រុកឱរ៉ាល់បាននិយាយបន្តថា ក្រោយពីបានទទួលព័ត៌មានខាងលើរួចមក កម្លាំងជំនាញនៃអធិការដ្ឋាននគរបាលស្រុកឱរាល់ រួមជាមួយកម្លាំងប៉ុស្តិ៍នគរបាលត្រពាំងជោ ចុះដល់កន្លែងកើតហេតុ បានធ្វើការឃាត់ខ្លួន ជនសង្ស័យខាងលើ យកមកអធិការដ្ឋាននគរបាលស្រុកឱរ៉ាល់ ជាបណ្ដោះអាសន្ន។
ក្រោយសួរនាំ ជនដៃដល់ជាប្តីសារភាពថា ពិតជាបានប្រហិង្សា និងយកពន្លៀក ចាក់ ក ដៃប្រពន្ធមែន បច្ចុប្បន្នជនដៃដល់ជាប្តី កំពុងសួរនាំ និងកសាងសំណុំបញ្ជូនទៅកាន់ស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមផ្លូវច្បាប់៕
