ភ្នំពេញ: រថយន្តក្រុងដឹកជនជាតិចិនបានរេចង្កូតជ្រុលទៅបុករបាំងថ្មពុះចែកទ្រូងផ្លូវបណ្តាលឲ្យរងការខូចខាតអស់ចំនួន០៤កង់និងបណ្ដាលឱ្យរងរបួសបុរសម្នាក់ត្រូវបានសមត្ថកិច្ចឃាត់យកទៅសួរនាំភ្លាមៗ។ ហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង១២និង៤០នាទីរំលងអធ្រាត្រឈានចូលថ្ងៃទី១៩ខែកក្កដា ឆ្នាំ២០២៥ នៅតាមបណ្ដោយផ្លូវ លេខ២៨៩ដែលស្ថិតនៅសង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
តាមប្រភពព័ត៌មានបានអោយដឹងថា នៅមុនពេលកេីតហេតុគេឃើញរថយន្តក្រុងមួយគ្រឿងម៉ាកហុីយ៉ាន់ដាយពណ៌ខៀវលាយស ពាក់ផ្លាកលេខភ្នំពេញ3E-3443 ធ្វើដំណើរតាមបណ្ដោយផ្លូវលេខ២៨៩ក្នុងទិសដៅពីជេីងទៅត្បូងដោយល្បឿនយ៉ាងលឿន។ បន្ទាប់មកក៏ស្រាប់តែរថយន្តនោះរេចង្កូតទៅផ្នែកខាងឆ្វេងជ្រុលទៅបុករបាំងថ្មពុះចែកទ្រូងផ្លូវបណ្តាលខូចខាតអស់ចំនួន០៤កង់ ហេីយពេលនោះស្រាប់តែមានជនជាតិចិនជាច្រេីននាក់បាននាំគ្នារត់ចុះពីលើរថយន្ត នៅសល់តែអ្នកបេីកបរម្នាក់និងជនជាតិចិនម្នាក់បានរងរបួស ។ ចំណែកអ្នកបេីកបរក៏គេចខ្លួនបាត់ជាបន្តទៀត ដោយនៅសល់ជនជាតិចិនម្នាក់បានយកដងអំបោសជ័រដេញវាយបងប្អូនប្រជាពលរដ្ឋ ហេីយត្រូវបានឃាត់ខ្លួនភ្លាមៗ។
ប្រភពបានបន្ដទៀតថា បុរសជាជនជាតិចិនម្នាក់ខាងលេី បាននិយាយប្រាប់ថាគាត់ត្រូវគេវាយ ហេីយជនបង្កនាំគ្នារត់គេចខ្លួនអស់ហេីយ ។ លុះក្រោយមកសមត្ថកិច្ចនគរបាលប៉ុស្តិ៍និងសមត្ថកិច្ចអន្តរាគមន៍ខណ្ឌទួលគោក តាមឃាត់ជនជាតិចិនចំនួន១១នាក់នៅជិតកន្លែងកើតហេតុ ក្នុងនោះមានស្រីម្នាក់ផងដេីម្បីយកទៅសួរនាំនៅអធិការដ្ឋាននគរបាលខណ្ឌទួលគោក ។ ចំណែករថយន្តបង្កខាងលើដែលបេីកបុករបាំងថ្មពុះចែកទ្រូងផ្លូវខូចខាតអស់ចំនួន០៤កង់នោះ ត្រូវបានសមត្ថកិច្ចនគរបាលខណ្ឌទួលគោកទាក់ទងទៅសមត្ថកិច្ចជំនាញនៃការិយាល័យចរាចរណ៍ផ្លូវគោករាជធានីភ្នំពេញដើម្បីស្ទូចរថយន្តបង្កខាងលើយកទៅរក្សាទុករង់ចាំការដោះស្រាយថ្ងៃក្រោយ៕
ដោយ ៖ ភារ៉ា ដង្កោ
