ភ្នំពេញ៖ ម៉ូតូ២គ្រឿងជិះខ្វះការប្រុងប្រយ័ត្ននៅផ្លូវបំបែកជាបួនធ្វើឱ្យជ្រុលទៅបុកគ្នាយ៉ាងពេញទំហឹងបណ្ដាលឱ្យមានអ្នករបួសធ្ងន់និងស្រាលចំនួន៣នាក់។
ហេតុការណ៍នេះបានកើតឡេីងនៅវេលាម៉ោង១០និង៣០នាទីយប់ថ្ងៃទី៣០ ខែកក្កដា ឆ្នាំ២០២៥ នៅចំណុចផ្លូវលេខ១៩៩កែងផ្លូវលេខ៣២៨ ក្នុងសង្កាត់ទួលស្វាយព្រៃទី១ ខណ្ឌបឹងកេងកង ។
តាមប្រភពព័ត៌មានពីកន្លែងកើតហេតុ បានអោយដឹងថា មុនពេលកេីតហេតុគេឃើញបុរសម្នាក់ជាអ្នកដឹកជញ្ជូនម្ហូបអាហារអនឡាញ បានជិះម៉ូតូម៉ាក ស៊ុយហ្ស៊ុយគីនិច ពណ៌សលាយក្រហម ពាក់ស្លាកលេខ ភ្នំពេញ 1JV-3104 តាមបណ្ដោយផ្លូវលេខ១៩៩ក្នុងទិសដៅពី លិចទៅកេីត លុះមកដល់ចំណុចកេីតហេតុដែលជាផ្លូវបំបែកជាបួន ក៏ស្រាប់តែមានបុរសម្នាក់ស្រវឹងស្រាបានជិះម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ កំពង់ចាម1H-0962 បោះពួយតាមបណ្ដោយផ្លូវលេខ៣២៨ក្នុងទិសដៅពីជេីងទៅត្បូងដោយល្បឿនលឿនព្រមទាំងខ្វះការប្រុងប្រយ័ត្នផងក៏ជ្រុលទៅបុកម៉ូតូនិចចំពាក់កណ្ដាលម៉ូតូយ៉ាងពេញទំហឹងបណ្ដាលឱ្យអ្នកអង្គុយខាងក្រោយរងរបួសបាក់ជើងខាងឆ្វេង ចំណែកអ្នកបេីកម៉ូតូរងរបួសតិចតួច អ្នកទាំង២ត្រូវបានបញ្ជូនតាមរថយន្តសាមុយយកទៅសង្គ្រោះនៅមន្ទីរពេទ្យរុស្ស៊ី។
រីឯបុរសដែលជិះម៉ូតូហុងដាឌ្រីមវិញរបួសបែកក្បាលហូរឈាមសន្លប់ស្ដូកស្ដឹងត្រូវបានបញ្ជូនតាមរថយន្តសាមុយយកទៅសង្គ្រោះនៅមន្ទីរពេទ្យរុស្ស៊ីដូចគ្នា ។
ក្រោយកេីតហេតុដោយមិនអាចដោះស្រាយបានសមត្ថកិច្ចជំនាញចរាចរណ៍ក៏បានធ្វើការវាស់វែងយកមធ្យោបាយទាំង២គ្រឿងទៅរក្សាទុកនៅអធិការដ្ឋាននគរបាលខណ្ឌបឹងកេងកងរង់ចាំដំណោះស្រាយនាពេលក្រោយ ៕
ដោយ៖សុខាសែនជ័យ
