ខេត្តពោធិ៍សាត់ ៖ យ៉ាងហោច​គោយន្តកន្រ្តៃមានផ្ទុកឈើអារពេញចំនួន០២គ្រឿង ត្រូវបាន​សមត្ថកិច្ច​ជំនាញ​បរិស្ថាន​ធ្វើការបង្រ្កាប ដើម្បី​យកទៅបន្តនីតិវិធី ។​ នេះបើតាមការបញ្ជាក់ពី​លោក ប្រធានមន្ទីរបរិស្ថាន ខេត្តពោធិ៍សាត់ នាព្រឹកថ្ងៃអង្គរ ៣រោច ខែស្រាពណ៍ ឆ្នាំ​ម្សាញ់ សប្គស័ក ព.ស ២៥៦៩ ត្រូវ​នឹង​ថ្ងៃ​ទី​១២ ខែសីហា ឆ្នាំ​២០២៥ នេះ ។​

លោក ប្រធានមន្ទីរបរិស្ថានដែលបានដឹកនាំ និងបញ្ជាផ្ទាល់ ដល់មន្រ្តីឧទ្យានុរក្ស និងមន្ត្រី​ស្ម័គ្រចិត្ត អនុវត្ត​ន៍គម្រោងអង្គការអភិរក្សអន្តរជាតិ(CI)ឲ្យ​ដឹង​ទៀត​ថា បានចុះល្បាតទប់ ស្កាត់ និងបង្រ្កាប បានប្រទះឃើញគោយន្តកន្រ្តៃកំពុងធ្វើសកម្មភាពដឹកជញ្ជូនឈើអារជាក់ស្ដែងចំនួន០២គ្រឿង ត្រូង់ចំណុងក្បែភ្នំមួយ ស្ថិត​នៅ​ភូមិសាយ ឃុំព្រងិល ស្រុកភ្នំក្រវាញ ខេត្តពោធិ៍សាត់ ។​

លោក ប្រធានមន្ទីរបញ្ជាក់ទៀតថា ឈើអារប្រភេទចំរុះចំនួន៧១សន្លឹក ស្មើ​នឹង​ប្រមាណ​២ម៉ែត្រត្រីគុណ ។ បច្ចុប្បន្ន វត្ថុ​តាង​គោយន្តកន្រ្តៃមានផ្ទុកឈើអារខាងលើ រក្សាទុក​ជាបណ្ដោះអាសន្ន​នៅ កស្នាក់ការឧទ្យាន​ជាតិ​ជួរភ្នំ​ក្រវាញ​កណ្ដាល ភូមិវាល ឃុំសំរោង ស្រុកភ្នំក្រវាញ ខេត្តពោធិ៍សាត់ ដើម្បី​បន្តនីតិវិធី ចំពោះ​ក្រុមជនប្រព្រិត្តគេចខ្លួន ។​

លោក បញ្ជាក់​បន្ថែម​ទៀត​ថា ចំពោះ​សកម្មភាព​អារច្រៀកឈើខុសច្បាប់ខាងលើនេះ លោក សន្យា​បន្តដឹកនាំមន្រ្តីក្រោមឧវ៉ាត ចុះពិនិត្យ ទប់ស្កាត់ និងបង្រ្កាបឲ្យដូចភ្លៀងរលឹម ៕ ដោយៈ ប៉ឹម ពិន​