អន្តរជាតិ : នៅថ្ងៃទី ១៥ ខែសីហា ឆ្នាំ ២០២៥ កិច្ចប្រជុំរដ្ឋមន្ត្រីការបរទេសលើកទី ១០ នៃយន្តការសហប្រតិបត្តិការឡានឆាង-មេគង្គបានបើកធ្វើនៅទីក្រុង Anning ខេត្ត Yunnan ប្រទេសចិន ។ លោក Wang Yi សមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនីស្តចិននិងជារដ្ឋមន្ត្រីការបរទេសចិននិងលោក Maris Sangiampongsa រដ្ឋមន្ត្រីការបរទេសថៃបានធ្វើជាសហអធិបតីក្នុងកិច្ចប្រជុំ។ ។ លោក ប្រាក់ សុខុន ឧបនាយករដ្ឋមន្ត្រីនិងជារដ្ឋមន្ត្រីក្រសួងការបរទេសនិងសហប្រតិបតិ្តការអន្តរជាតិកម្ពុជា លោក Thongsavanh រដ្ឋមន្រ្តីក្រសួងការបរទេសឡាវ លោក U Than Swe រដ្ឋមន្ត្រីការបរទេសមីយ៉ាន់ម៉ានិងលោក Bui Thanh Son ឧបនាយករដ្ឋមន្ត្រីនិងជារដ្ឋមន្រ្តីការបរទេសវៀតណាមបានអញ្ជើញចូលរួម ។
លោក Wang Yi បានលើកឡើងថា ឆ្លងតាមរយៈកិច្ចខិតខំប្រឹងប្រែងអស់រយៈពេល ១០ ឆ្នាំ យន្តការសហប្រតិបត្តិការមេគង្គ-ឡានឆាងទទួលបានលទ្ធផលជាផ្លែផ្កានាពេលបច្ចុប្បន្ន ហើយទស្សនៈស្តីពី”ការហូបទឹកនៃទន្លេតែមួយ ជោគវាសនាផ្សារភ្ជាប់គ្នាយ៉ាងស្អិតល្មួត”បានជ្រាបចូលកាន់តែជ្រៅទៅក្នុងក្រអៅដួងចិត្តរបស់ប្រជាជន ។ ក្នុងរយៈពេល ១០ ឆ្នាំកន្លងមកនេះ យន្តការសហប្រតិបត្តិការមេគង្គ-ឡានឆាងបានឈានចូលគន្លងល្បឿនលឿនសម្រាប់ការអភិវឌ្ឍដោយគ្រប់ជ្រុងជ្រោយដែលបានក្លាយជាយន្តការសហប្រតិបត្តិការដែលមានកម្លាំងរស់រវើកនិងសក្តានុពលអភិវឌ្ឍន៍បំផុតក្នុងតំបន់ ។
លោក Wang Yi បានសង្កត់ធ្ងន់ថា ឈរលើទីចាប់ផ្តើមថ្មី បណ្តាភាគីនានាគួរធ្វើកិច្ចខិតខំប្រឹងប្រែងដើម្បីបង្កើត”យន្តការសហប្រតិបត្តិការឡានឆាង-មេគង្គទម្រង់ 2.0 ”ដែលមានលក្ខណៈសាមគ្គីភាពនិងកិច្ចសហប្រតិបត្តិការនិងប្រកបដោយការបើកទូលាយនិងឈ្នះ-ឈ្នះ ភាពបៃតងនិងការច្នៃប្រឌិតថ្មី សន្តិភាពនិងស្ងប់សុខ ក្នុងន័យពន្លឿនការកសាងសហគមន៍រួមវាសនានៃប្រទេសឡានឆាង-មេគង្គដែលឆ្ពោះទៅរកសន្តិភាពនិងវិបុលភាព ។ ភាគីនានាដែលចូលរួមកិច្ចប្រជុំបានឯកភាពគ្នារក្សាការប្រាស្រ័យទាក់ទងយ៉ាងជិតស្និទ្ធដើម្បីត្រៀមលក្ខណៈឱ្យបានល្អសម្រាប់កិច្ចប្រជុំកំពូលនៃយន្តការសហប្រតិបត្តិការឡានឆាង-មេគង្គលើកទី ៥ ក៏ដូចជាគ្រោងផែនការសម្រាប់” ១០ ឆ្នាំមាស”បន្ទាប់ ៕
ប្រភព ; ( CCFR)
