ភ្នំពេញ៖ រថយន្តតូយ៉ូតាព្រុសបេីកដោយបុរសជនជាតិចិនជ្រុលទៅបុកក្បាលនាគថ្មពុះចែកទ្រូងផ្លូវបណ្ដាលឲ្យរថយន្តហោះទៅគងជាប់រងការខូចខាតយ៉ាងដំណំ ។
ហេតុការណ៍នេះបានកើតឡើងនៅម៉ោង១០យប់ថ្ងៃទី១៧ខែសីហាឆ្នាំ២០២៥ ជិតរង្វង់មូលកោះពេជ្រ ផ្លូវកោះពេជ្រសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុបានឲ្យដឹងថា មុនពេលកេីតហេតុ គេបានឃើញបុរសជនជាតិចិនម្នាក់បេីករថយន្តម៉ាកតូយ៉ូតាព្រុស ពណ៌ស្ករ ពាក់ស្លាកលេខ ភ្នំពេញ 2BF- 0901 ធ្វើដំណើរតាមបណ្ដោយផ្លូវកោះពេជ្រក្នុងទិសដៅពីត្បូងទៅជើង លុះមកដល់ចំណុចកេីតហេតុក៏បានបើកជែងគ្នា ធ្វេីឲ្យរថយន្តជ្រុលទៅបុកក្បាលនាគថ្មពុះចែកទ្រូងផ្លូវយ៉ាងពេញទំហឹង ហើយហោះគងជាប់ពីលេីក្បាលនាគថ្មរងការខូចខាតខ្ទេចស្រុញផ្នែកខាងមុខរថយន្ត តែមិនមានគ្រោះថ្នាក់ដល់មនុស្សទេ។
ដោយឡែកក្បាលនាគថ្មពុះចែកទ្រូងផ្លូវវិញរងការខូចខាតតិចតួចតែប៉ុណ្ណោះ ។
ចំពោះករណីនេះក៏មានតំណាងភាគីទាំងពីរបានសម្របសម្រួលគ្នាដោយខាងរថយន្តជួយចេញថ្លៃការជួសជុលអោយទៅខាងក្រុមហ៊ុនកោះពេជ្របញ្ចប់រឿងតែម្តង ៕
ដោយ៖សុខាសែនជ័យ
