ខេត្តសៀមរាប៖ ក្រឡាញ់ចាប់ផ្ដើមមានផ្លែទុំហើយ នៅតំបន់ខ្លះក្នុងខេត្តសៀមរាប នៅចុងខែសីហានេះ។ ក្រឡាញ់ ជាឈ្មោះឈើព្រៃមួយប្រភេទ ដែលមានផ្លែអាចបរិភោគបាន។ ក្រឡាញ់មានផ្លែតូចៗ ពេលខ្ចីពណ៌បៃតង និងពេលទុំពណ៌ខ្មៅ និងមានរសផ្អែមលាយចត់តិចៗ ដែលអាចបរិភោគបាន។ ដើម្បីបន្សាបជាតិចត់ក្នុងផ្លែក្រឡាញ់ទុំ គេគ្រាន់តេបកសំបក រួចយកទៅហាលទឹកសន្សើម នោះផ្លែក្រឡាញ់នឹងមានរសជាតិផ្អែមឆ្ងាញ់ពិសា។
ក្រឡាញ់មានអត្ថប្រយោជន៍ច្រើនណាស់។ ក្រៅពីផ្លែក្រឡាញ់ ក៏ត្រូវបានប្រើប្រាស់ជារុក្ខជាតិឱសថផងដែរ។ ស្លឹករបស់វាក៏គេប្រើជឱសថសម្រាប់ព្យាបាល ជំងឺគ្រុនចាញ់ ព្យាបាលក្រពះ កាត់បន្ថយការលើសសម្ពាធឈាមជាដើម។ ចំណែកឯសម្បកចាស់ៗ ប្រើសម្រាប់ជំនួសស្លា ពេលចាស់ៗពិសាម្លូ។
រីឯដើមរបស់វា អាចយកមកធ្វើជាសសរផ្ទះ រនូត ក្ដារ ក្ដារក្រាល ជញ្ជាំង ដែលអាចទុកបានដល់ទៅ៥០-១០០ឆ្នាំ។ មិនតែប៉ុណ្ណោះគេក៏យកមកធ្វើជារបស់ប្រើប្រាស់បានដូចជា ជ្រញ់ ត្បាល់ ដងកាំបិត ដងពូថៅ ដងផ្គាក់ ដងកណ្ដៀវ ជាពិសេសធ្វើរទេះគោ ជាដើម។ ក្រឡាញ់ អាចមានកម្ពស់ពី១៥-២៥ម៉ែត្រ ដែលមានដុះនៅព្រៃស្រោង ឬក្រាស់ នៅតំបន់ព្រៃអង្គរក៏សម្បូរដើមក្រឡាញ់នេះដែរ៕
ប្រភព និងរូបភាព៖ថ្មីថ្មី
