ភ្នំពេញ៖ អគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានឱ្យដឹងថា លោកឧត្តមសេនីយ៍ឯក អាត់ បូនី អគ្គនាយករង នៃអគ្គនាយកដ្ឋានបច្ចេកវិទ្យាឌីជីថល និងផ្សព្វផ្សាយអប់រំ បានអញ្ជើញចូលរួមកិច្ចប្រជុំពិនិត្យ និងពិភាក្សាលើសេចក្ដីព្រាងច្បាប់ ស្ដីពីអន្តោប្រវេសន៍(ថ្មី) ក្រោមអធិបតីភាព លោក ប៊ុន ហុន រួមជាមួយ លោកសន្តិបណ្ឌិត គៀត ច័ន្ទថារិទ្ធ រដ្ឋលេខាធិការ ក្រសួងមហាផ្ទៃ ដែលកិច្ចប្រជុំនេះក៏មានការអញ្ជេីញចូលរួមពី អនុរដ្ឋលេខាធិការ តំណាងក្រុមប្រឹក្សានីតិកម្ម អគ្គនាយករង ព្រមទាំងថ្នាក់ដឹកនាំ និងមន្រ្តីជំនាញពាក់ព័ន្ធជាច្រេីនរូបទៀតផងដែរ នៅទីស្តីការក្រសួងមហាផ្ទៃ នាព្រឹកថ្ងៃពុធ ទី២៧ ខែសីហា ឆ្នាំ២០២៥ ។
សូមជម្រាបជូនថា ច្បាប់នេះមានគោលបំណងគ្រប់គ្រងជនបរទេសគ្រប់រូប ដោយកំណត់អំពីវិធាន និងលក្ខខណ្ឌ សម្រាប់អនុវត្តចំពោះជនបរទេសដែលចូល ចេញ ឆ្លងកាត់ និងស្នាក់នៅក្នុងព្រះរាជាណាចក្រកម្ពុជា។
ច្បាប់នេះដែរ មានវិសាលភាពអនុវត្តចំពោះជនបរទេសគ្រប់រូបដែលចូល ចេញ ឆ្លងកាត់ និងស្នាក់ នៅក្នុងព្រះរាជាណាចក្រកម្ពុជា លើកលែងតែក្នុងករណីដែលត្រូវអនុវត្តតាមវិធាននៃច្បាប់អន្តរជាតិ ដែលព្រះរាជាណាចក្រកម្ពុជាជាភាគីហត្ថលេខី ទោះបីជាជននោះបានចូលមកតាំងលំនៅមុនពេល ដែលច្បាប់នេះចូលជាធរមានហើយក៏ដោយ៕
ដោយ៖តារា
