ខេត្តកំពង់ស្ពឺ៖ អនុវត្ដតាមការដឹកនាំបញ្ជាពី លោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ លោកវរសេនីយ៍ឯក ចន សុភីត អធិការនគរបាលស្រុកបសេដ្ឋ បានដឹកនាំប្រតិបត្ដិការចុះស្រាវជ្រាវករណីកំហែងធាក់យកម៉ូតូដោយមានកាំបិតផ្គាក់ នៅយប់ថ្ងៃទី១៩ ខែសីហា ឆ្នាំ ២០២៥ វេលាម៉ោង ២០និង ៣០នាទី ចំណុចលើផ្លូវជាតិលេខ៣ គីឡូម៉ែត្រលេខ ៥៩-៦០ ស្ថិតក្នុងភូមិត្រពាំងទំនាប់ ឃុំទួលអំពិល ស្រុកបសេដ្ឋ ខេត្តកំពង់ស្ពឺ ។
យោងតាមដំណេីរអង្គហេតុ មានជនសង្ស័យមិនស្គាល់
អត្តសញ្ញាណ១ក្រុមជិះម៉ូតូម៉ាកហុងដាC125 ពណ៌ខ្មៅ មិនស្គាល់ស្លាកលេខ តាមពីក្រោយជនរងគ្រោះឈ្មោះ អំ ចាន់ដេត ភេទប្រុស អាយុ១៨ឆ្នាំ រស់នៅភូមិព្រៃខ្លា ឃុំទួលអំពិល ស្រុកបសេដ្ឋ ជិះម៉ូតូម៉ាកហុងដាC125 ឆ្នាំ ២០២៥ ពណ៌ខ្មៅ ផ្លាកលេខភ្នំពេញ 1LJ-0778 បានធ្វើសកម្មភាពធាក់ជនរងគ្រោះ១ជើង បណ្ដាលឱ្យដួលរបួសដៃនិងជើង រួចក្រុមជនសង្ស័យបានលើកម៉ូតូជិះគេចខ្លួនទៅទិសខាងត្បូងបាត់ ។
ក្រោយប្រតិបត្ដិការសមត្ថកិច្ចបានអន្ដរាគមន៍ភ្លាមៗបានឃេីញជនសង្ស័យឈ្មោះ សួង ផុន ប្រុស២២ឆ្នាំ រស់នៅភូមិព្រៃស្រូល ឃុំពោធិអង្រ្កង ស្រុកបសេដ្ឋ បានរត់ ចោលម៉ូតូ និងបន្សល់ទុកកាំបិតផ្គាក់២ដើម។ លុះដល់ថ្ងៃទី២៨ ខែសីហា ឆ្នាំ២០២៥ កំលាំងជំនាញបានឈានដល់ធ្វើការឃាត់ខ្លួនជនសង្ស័យឈ្មោះសួង ផុន មកសួរនាំដើម្បីចាត់ការតាមនីតិវិធី ។
ចំពោះម៉ូតូជនរងគ្រោះ សមត្ថកិច្ចបានប្រគល់ជូនយកទៅប្រេីវិញ រីឯជនសង្ស័យបានបញ្ជូនមកអធិការដ្ឋាននគរបាលស្រុកសាកសួរបំពេញនីតិវិធីកសាងសំណុំរឿងបញ្ជូនទៅ ចាត់ការតាមផ្លូវច្បាប់៕
