ប្រទេសថៃ ៖ នាយករដ្ឋមន្ត្រីស្តីទីថៃ បានព្រមានអ្នកមានឥទ្ធិពលលើបណ្តាញសង្គម ដែលមានគម្រោងប្រើរថយន្តបាញ់លាមកដាក់បាតុករកម្ពុជា ដោយថ្លែងថាសកម្មភាពនេះ អាចនាំទៅដល់ករណីនៅតុលាការពិភពលោក (World Court)។ លោកបានបន្ថែមថា គម្រោងនេះវាមិនមែនជាជំហរផ្លូវការរបស់រដ្ឋាភិបាលថៃនោះទេ។ ចំពោះការព្រមាននេះ លោក ភូមិថាំ ក៏បារម្ភថា ខ្លួននឹងត្រូវគេរិះគន់ថាជា «ជនជាតិថៃមានបេះដូងខ្មែរ» ផងដែរ។

លោកបានសង្កត់ធ្ងន់ថា ប្រជាជនថៃត្រូវតែប្រុងប្រយ័ត្ន ដើម្បីធានាថាប្រទេសដទៃទៀតយល់ពីស្ថានការណ៍ ព្រោះសកម្មភាពបែបនេះអាចបង្កបញ្ហាពាក់ព័ន្ធនឹងបូរណភាពទឹកដី និងបញ្ហាផ្សេងៗទៀត ដែលអាចអូសទាញថៃទៅកាន់តុលាការយុត្តិធម៌អន្តរជាតិ (ICJ)។ លោកបានបញ្ជាក់ថា ថៃចង់ជៀសវាងតុលាការពិភពលោក ព្រោះខ្លួនមិនទទួលស្គាល់ដែនយុត្តាធិការរបស់តុលាការនោះឡើយ។

លោក ភូមិថាំ ក៏បានលើកឡើងផងដែរថា លោកបាននិយាយជាមួយក្រសួងការពារជាតិហើយ ហើយថាមិនមានបញ្ហាគួរឲ្យព្រួយបារម្ភធំដុំនោះទេ។ លោកថា វាជាបញ្ហានៃការយោគយល់គ្នាទៅវិញទៅមក ហើយថា ពិភពលោកយល់ថា នេះមិនមែនជាគោលនយោបាយផ្លូវការរបស់រដ្ឋាភិបាលថៃទេ ប៉ុន្តែជាសកម្មភាពរបស់ពលរដ្ឋប៉ុណ្ណោះ៕

ប្រែសម្រួលដោយ៖ The News