ភ្នំពេញ៖ លោក ប៉ែន បូណា អ្នកនាំពាក្យរាជរដ្ឋាភិបាលកម្ពុជា បានថ្លែងអះអាងថា ក្នុងរយៈពេលមួយខែ នៃកិច្ចព្រមព្រៀងបទឈប់បាញ់ កម្ពុជាបានគោរពយ៉ាងម៉ឺងម៉ាត់បំផុតរាល់គ្រប់ចំណុចទាំងអស់ ដែលបានឯកភាពគ្នាជាមួយភាគីថៃ។ លោក បន្ថែមថា ការផ្តល់តម្លៃនៃកិច្ចព្រមព្រៀងបទឈប់បាញ់ គឺជាការឆ្លុះបញ្ចាំងពីការផ្តល់តម្លៃដល់ជីវិតមនុស្ស និងបេះដូងស្រលាញ់សន្តិភាពរបស់ថ្នាក់ដឹកនាំ និងប្រជាជនកម្ពុជា។
ការថ្លែងបែបនេះរបស់លោកប្រធានអង្គភាពអ្នកនាំពាក្យរាជរដ្ឋាភិបាលក្នុងសេចក្តីសង្ខេបព័ត៌មានប្រចាំថ្ងៃ ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» សម្រាប់ថ្ងៃសុក្រ ៦កើត ខែភទ្របទ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៩ ខែសីហា ឆ្នាំ២០២៥ នៅទីស្តីការគណៈរដ្ឋមន្ត្រី។
ជាមួយគ្នានេះ លោកស្រី ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិ បានមានប្រសាសន៍ថា កម្ពុជាស្នើឲ្យភាគីថៃត្រូវគោរពឲ្យបានខ្ជាប់ខ្ជួនដូចកម្ពុជាដែរ នូវរាល់កិច្ចព្រមព្រៀងទាំងឡាយ ដែលបានឯកភាពគ្នានាពេលកន្លងទៅ ។
លោកស្រីអ្នកនាំពាក្យរូបនេះ បានគូសបញ្ជាក់ថា ជាពិសេសគឺកិច្ចព្រមព្រៀង កាលពីថ្ងៃទី២៨ ខែកក្កដា រវាងរាជរដ្ឋាភិបាលនៃប្រទេសទាំងពីរ និងស្មារតីឯកភាពនៃកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ GBC ទាំង១៣ចំណុច និងកិច្ចប្រជុំជាបន្តបន្ទាប់ទៀត នៃគណៈកម្មាធិការព្រំដែនកម្ពុជា និងថៃ RBC កម្រិតយោធភូមិភាគនៃប្រទេសទាំងពីរ(កម្ពុជា-ថៃ)។
លោកស្រីអ្នកនាំពាក្យ បានបន្តអះអាងថា ស្ថានភាពនៅព្រំដែនរវាងកម្ពុជា និងថៃគឺមាន លក្ខណៈស្ងប់ស្ងាត់ធម្មតា ប៉ុន្តែកងកម្លាំងកម្ពុជានៅតែបន្តប្រុងប្រយ័ត្នយ៉ាងខ្ជាប់ខ្ជួនបំផុតក្នុងស្មារតីការពារនូវអធិបតេយ្យ និងបូរណភាពទឹកដីរបស់ខ្លួន។
ជាថ្មីម្តងទៀត លោកស្រីឧត្តមសេនីយ៍ឯក ម៉ាលី សុជាតា បានគូសបញ្ជាក់ថា កម្ពុជា និងសហគមន៍អន្តរជាតិ បន្តអំពាវនាវយ៉ាងទទូចឲ្យភាគីថៃ ធ្វើការដោះលែងនូវទាហានកម្ពុជា ដែលទាហានថៃចាប់ទៅដោយខុសច្បាប់មកម្ពុជាវិញ ឲ្យបានឆាប់ ស្របទៅតាមច្បាប់មនុស្សធម៌អន្តរជាតិ ខណៈគិតមកដល់ថ្ងៃនេះ គឺមានរយៈពេល៣១ថ្ងៃ ដែលថៃចាប់ពួកគេទៅនោះ៕
ដោយ៖តារា
