ខេត្តបន្ទាយមានជ័យ៖ លោក ផន រឹម អនុរដ្ឋលេខាធិការ និងជាអ្នកនាំពាក្យក្រសួងសាធារណការ និងដឹកជញ្ជូន នៅរសៀលថ្ងៃទី២៩ ខែសីហា ឆ្នាំ២០២៥នេះ បានបង្ហាញពីកំណាត់ចុងក្រោយ ផ្លូវជាតិលេខ៥ សិរីសោភ័ណ-ប៉ោយប៉ែត ខេត្តបន្ទាយមានជ័យប្រវែង ៣៥,១៤គីឡូម៉ែត្រ សម្រចបានលទ្ធផល៣៣,៨%ហើយ គិតត្រឹមចុងខែសីហា ឆ្នាំ២០២៥នេះ។
លោកអ្នកនាំពាក្យរូបនេះ បានបញ្ជាក់ថា បើគ្មានការប្រែប្រួលទេ គម្រោងស្តារ និងលើកកម្រិតគុណភាពផ្លូវជាតិលេខ៥ កំណាត់ចុងក្រោយនេះ នឹងបញ្ចប់ក្នុងអំឡុងឆ្នាំ២០២៦ខាងមុខ។
ជាមួយគ្នានេះ លោក ផន រឹម សូមអំពាវនាវដល់បងប្ងូនប្រជាពលរដ្ឋអ្នកប្រើប្រាស់កំណាត់ផ្លូវជាតិលេខ៥ (សិរីសោភ័ណ-ប៉ោយប៉ែត)បើកបរដោយប្រុងប្រយ័ត្នខ្ពស់ ប្រកបដោយការទទួលខុសត្រួវ ពោលគឺត្រូវបើកបរក្នុងល្បឿនមួយអាចគ្រប់គ្រងបាន ដើម្បីធានាសុវត្ថិភាពខ្លួនឯង និងអ្នកដទៃ និងបើកបរក្នុងល្បឿនសមល្មមកាត់បន្ថយការហុយដី និងខ្ចាយភក់លើបងប្អូនប្រជាពលរដ្ឋរស់នៅតាមដងផ្លូវ និងអ្នកដំណើរដោយយានយន្តធុនស្រាល។
បន្ថែមពីនេះ អ្នកនាំពាក្យរូបនេះ ក៏សូមថ្លែងអំណរគុណដល់បងប្អូនប្រជាពលរដ្ឋរស់នៅតាមសងខាងផ្លូវ និងប្រជាពលរដ្ឋអ្នកដំណើរ ដែលមានការយោគយល់ និងអធ្យាស្រ័យខ្ពស់ ដល់ដំណើរការការដ្ឋានផ្លូវជាតិលេខ៥កំណាត់ចុងក្រោយ នារដូវវស្សាភ្លៀងធ្លាក់ជោគជាំនេះ៕
ដោយ៖តារា
