ភ្នំពេញ៖ បុរសម្នាក់សង្ស័យជិះម៉ូតូកៀរទ្រូងផ្លូវបណ្ដាលឲ្យដួលបោកក្បាលហូរឈាមស្លាប់នៅកណ្ដាលផ្លូវ ។
ហេតុការណ៍នេះបានកើតឡើងនៅម៉ោង ១១យប់ថ្ងៃទី១៥ខែកញ្ញាឆ្នាំ២០២៥ តាមបណ្ដោយផ្លូវមហាវិថីឈ្នះឈ្នះ សង្កាត់សំរោងក្រោម ខណ្ឌពោធិសែនជ័យ ។
សមត្ថកិច្ចបានឲ្យដឹងថា សពជនរងគ្រោះមានឈ្មោះ សេក ពិសី អាយុ៣៨ឆ្នាំ មុខរបរកម្មករឃ្លាំងក្រណាត់ ស្នាក់នៅផ្ទះលេខ២៧៥ ភូមិត្រពាំងធ្នង់ សង្កាត់សំរោងក្រោម ខណ្ឌពោធិសែនជ័យ មានស្រុកកំណើត ឃុំបែកចាន់ ស្រុកអង្គស្នួល ខេត្តកណ្តាល ។
ប្រភពព័ត៌មានពីកន្លែងកើតហេតុ បានអោយដឹងថា មុនពេលពេលកេីតហេតុ គេបានឃើញបុរសរងគ្រោះបានជិះម៉ូតូម៉ាកហុងដាវ៉ែ ពណ៌ខ្មៅ ពាក់ស្លាកលេខ ភ្នំពេញ 1JU 1759 ជិះធ្វើដំណើរតាមបណ្ដោយផ្លូវ មហាវិថីឈ្នះឈ្នះ ទិសដៅពី ត្បូងទៅជើងលុះមកដល់ចំនុចកេីតហេតុ សង្ស័យជ្រុលទៅកៀរនិងរបាំងថ្មពុះចែកទ្រូងផ្លូវបណ្ដាលឲ្យដួលអូសបោកក្បាលស្លាប់ ។
ចំណែប្រភពផ្សេងទៀត ថាអាចជនរងគ្រោះដួលហើយត្រូវរថយន្តមិនស្គាល់ម៉ាកកិនពីលើ ទេីបបណ្ដាលឲ្យស្លាប់ព្រោះលេីខ្លួនជនរងគ្រោះមានស្នាមកង់រថយន្ត ។
បន្តិចក្រោយមកក៏មានកម្លាំងសមត្ថកិច្ចមូលដ្ឋាននិងជំនាញបានចុះទៅកន្លែងកេីតហេតុ និងបានទាក់ទងរកសាច់ញាតិ អោយមកទទួលសពផងដែរ ។
ភ្លាមៗនោះផងដែរសាច់ញាតិមកដល់បានអោយដឹងថា ជនរងគ្រោះទេីបចេញពីធ្វើការត្រលប់ទៅផ្ទះវិញ ទើបដំណឹងថាជួបគ្រោះថ្នាក់ចរាចរណ៍បែបនេះ ។
បន្ទាប់ពីកេីតហេតុសមត្ថកិច្ចបានធ្វើលិខិតប្រគល់សពអោយសាច់ញាតិយកទៅចាត់ចែងធ្វើបុណ្យតាមប្រពៃណី ចំនែកមធ្យោបាយសមត្ថកិច្ចយកទៅរក្សាទុកនៅផ្នែកជំនាញនៃអធិការខណ្ឌពោធិសែនជ័យ ដេីម្បីតាមជំនាញរបស់សមត្ថកិច្ចជាបន្ត ៕
ដោយ៖ ជ្រោយពេជ្រ
