ប្រទេសម៉ាឡេសុី ៖ លោកស្រី ឡោក ខេង ប្រធានគណៈកម្មការសុខាភិបាល សង្គមកិច្ច អតិយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារីនៃរដ្ឋសភា បានអញ្ជើញដឹកនាំគណៈប្រតិភូសភាកម្ពុជា ចូលរួមកិច្ចប្រជុំសមាជិកសភាស្រ្តីអាយប៉ា (WAIPA) នៃមហាសន្និបាតអាយប៉ាលើកទី៤៦ នៅក្នុងប្រទេសម៉ាឡេស៊ី នៅរសៀលថ្ងៃទី១៨ ខែកញ្ញាឆ្នាំ២០២៥។

កិច្ចប្រជុំនេះ ពិភាក្សាអនុម័តលើសេចក្តីព្រាងសេចក្តីសម្រេចចំនួន៥ ក្នុងនោះមាន សេចក្តីព្រាងសេចក្តីសម្រេច៤ ដែលកម្ពុជាបានឯកភាពសហការគាំទ្រជាមួយប្រទេសផ្តួចផ្តើម មានសេចក្តីព្រាងសេចក្តីសម្រេច ស្តីពីការគំាទ្រកិច្ចខិតខំប្រឹងប្រែងរួមគ្នាលើការចូលរួម និងភាពជាអ្នកដឹកនាំរបស់ស្រ្តីក្នុងវិស័យនយោបាយនៅក្នុងតំបន់អាស៊ាន ផ្តួចផ្តើមឡើងដោយសភាប្រទេសម៉ាឡេស៊ី។ សេចក្តីព្រាងសេចក្តីសម្រេចស្តីពី ការផ្តល់ភាពអង់អាចដល់ស្រ្តីនិងការលើកកម្ពស់សមភាពយេនឌ័រក្នុងតំបន់អាស៊ាន តាមរយៈសេដ្ឋកិច្ចថែទាំ ដែលផ្តួចផ្តើមឡើងដោយសភាប្រទេសម៉ាឡេស៊ី។ សេចក្តីព្រាងសេចក្តីសម្រេចស្តីពិការជំរុញសមភាពយេនឌ័រ តាមរយៈការលើកកម្ពស់ចំណេះជំនាញឌីជីថលដល់ស្រ្តី ដែលផ្តួចផ្តើមឡើងដោយរដ្ឋសភាប្រទេសឡាវ។
លោកស្រី ឡោក ខេង បានថ្លែងនៅក្នុងកិច្ចប្រជុំពីការប្តេជ្ញាក្នុងការប្រឹងប្រែងធានាថាស្ត្រី និងកុមារីនៅទូទាំងអាស៊ាន និងជុំវិញពិភពលោកអាច សម្រេចបាននូវ ដឹងពីសក្តានុពលពេញលេញរបស់ពួកគេ។ លោកស្រីបញ្ជាក់ថា រាល់ពេលមានជម្លោះ និងវិបត្តិ ស្ត្រីនិងកុមារគឺងាយរងគ្រោះជាទីបំផុត។ ក្នុងនាមជាសមាជិកសភា មានកាតព្វកិច្ចទទួលខុសត្រូវលើរដ្ឋាភិបាលក្នុងការរក្សាសន្តិភាព និងស្ថិរភាព។
ប្រតិភូសភាកម្ពុជា បានលើកឡើងបន្តថា ជម្លោះឈ្លានពានរបស់លើកម្ពុជា បានបង្កការគំរាមកំហែងជាខ្លាំងដល់សន្តិសុខមនុស្សជាតិ ជាពិសេសចំពោះស្ត្រី និងកុមារ។ ចាំបាច់ត្រូវមានវិធានការសំខាន់ៗ ដើម្បីការពារជម្លោះបែបនេះ កុំឱ្យកើតឡើងជាថ្មីម្តងទៀត។ គណៈប្រតិភូសភាកម្ពុជា បានគូសបញ្ជាក់ថាសន្តិភាព និងស្ថិរភាពជាស្នូល។ បើគ្មានវាទេ យើងមិនអាចសម្រេចបំណងគ្រប់យ៉ាងបានឡើយ។ ការបន្តរំលោភលើបទឈប់បាញ់របស់ប្រទេសថៃ បានបំផ្លាញទំនុកចិត្ត និងហានិភ័យនៃការកើតឡើងវិញនៃជម្លោះប្រដាប់អាវុធ ដែលបំផ្លាញភាពជឿជាក់ និងកិត្តិសព្ទរបស់អាស៊ាន។
លោកស្រី ឡោក ខេង បានគូសបញ្ជាក់ថា “ក្នុងពេលនេះ ខ្ញុំសូមថ្លែងអំណរគុណយ៉ាងជ្រាលជ្រៅចំពោះមិត្តអន្តរជាតិទាំងអស់ ដែលបានគាំទ្របទឈប់បាញ់រវាងកម្ពុជា និងថៃ ដើម្បីទទួលបានសន្តិភាពសម្រាប់អាស៊ានផងដែរ។ សូមអំពាវនាវដល់សមាជិកសភាទាំងអស់នៅទីនេះ លើកតម្កើងគុណតម្លៃសន្តិភាព និងប្រកាន់ខ្ជាប់នូវធម្មនុញ្ញអង្គការសហប្រជាជាតិ និងរដ្ឋាភិបាលដែលទទួលខុសត្រូវចំពោះការប្តេជ្ញាចិត្តជាសកល” ៕

ដោយ ៖ សិលា