ខេត្តកំពង់ស្ពឺ ៖ យុវជនម្នាក់ត្រូវបានម្តាយបង្កើតដាច់ចិត្តប្តឹងឱ្យនគរបាលឃាត់ខ្លួន ព្រោះសង្ស័យប្រើគ្រឿងញៀនលើសកម្រិតហើយស្រែកឡូឡា បង្កការអុកឡុកនិងស្ទុះទៅទាញកាំបិតប៉័ងតោ និងអង្រែបុកគ្រឿងវាយបំផ្លិចបំផ្លាញទ្រព្យសម្បត្តិក្នុងផ្ទះ ពេលម្តាយទៅឃាត់បានគំរាមវាយម្តាយថែមទៀត ហើយដោយទ្រាំមិនបានម្តាយក៏ដាច់ចិត្តប្តឹងឱ្យនគរបាលឃាត់ខ្លួនកូននោះតែម្តង។
ករណីការឃាត់ខ្លួនកូនប្រុសសង្ស័យប្រើគ្រឿងញៀនលើសកម្រិតបំផ្លាញទ្រព្យសម្បត្តិនេះ ធ្វើឡើងកាលពីវេលាម៉ោង៨និង៣០នាទីព្រឹកថ្ងៃទី២៤ ខែកញ្ញា ឆ្នាំ២០២៥ នៅក្នុងភូមិព្រៃកន្ទោច ឃុំទឹកល្អក់ ស្រុកគងពិសី ខេត្តកំពង់ស្ពឺ ។
មន្ត្រីនគរបាលស្រុកគងពិសីបានឱ្យដឹងថា យុវជនដែលម្តាយប្តឹងឱ្យឃាត់ខ្លួន ឈ្មោះ ឡៃ ថុនា ភេទប្រុស អាយុ២៤ឆ្នាំ មុខរបរមិនពិតប្រាកដ រស់នៅជាមួយម្តាយក្នុងភូមិព្រៃកន្ទោច ឃុំទឹកល្អក់ ស្រុកគងពិសី ខេត្តកំពង់ស្ពឺ ។
មុនពេលកើតហេតុយុវជនខាងលើនេះបានធ្វើសកម្មភាពស្រែកឡូឡានិងបង្កការអុកឡុកក្នុងផ្ទះ ដោយនៅក្នុងដៃមានកាន់កាំបិតប៉័ងតោដងឈើ និងអង្រែបុកគ្រឿងខ្លី១ដើមបានគំរាមវាយទៅលើម្តាយដែលមានឈ្មោះ ឃួន ណាន អាយុ៤៨ឆ្នាំ រស់នៅភូមិឃុំខាងលើ ពេលនោះស្ត្រីជាម្តាយបានទៅហាមឃាត់ និងស្តីបន្ទោសឱ្យយុវជនជាកូន ស្រាប់តែជនសង្ស័យខឹងសម្បា ហើយក៏ស្ទុះទៅវាយបំផ្លិចបំផ្លាញទ្រព្យសម្បត្តិក្នុងផ្ទះ បោកចាន ឆ្នាំងដាំបាយ កង្ហាពីរគ្រឿងព្យួរជញ្ជាំង ធាក់ទ្វារផ្ទះបាយ ទ្វារបន្ទប់ទឹកបណ្តាលឲ្យរងការខូចខាត ។
ដោយទ្រាំនូវទង្វើរបស់កូនប្រុសលែងបាន ទើបម្តាយបានតេទូរស័ព្ទហៅសមត្ថកិច្ច ដើម្បីធ្វើការនាំខ្លួនឈ្មោះ ឡៃ ថុនា ខាងលើយកមកប៉ុស្តិ៍នគរបាលរដ្ឋបាលទឹកល្អក់ដើម្បីធ្វើការសួរនាំនិងកសាងសំណុំរឿងបន្ត ។
បើតាមការបញ្ជាក់ពីម្តាយយុវជនដៃដល់ខាងលើ ឈ្មោះ ឃួន ណាន ថា កន្លងទៅកូនប្រុសរបស់គាត់ (យុវជនសង្ស័យ)ខាងលើធ្លាប់បានប្រើប្រាស់គ្រឿងញៀនហើយគាត់ធ្លាប់បានយកដាក់នៅមណ្ឌលអប់រំកែប្រែ២ដងរួចមកហើយ ប៉ុន្តែកូនប្រុសនៅតែមិនចេះកែខ្លួន ទើបគាត់ដាច់ចិត្តប្តឹងឱ្យនគរបាលឃាត់ខ្លួនអនុវត្តទៅតាមផ្លូវច្បាប់ចុះ។
បច្ចុប្បន្ន យុវជនសង្ស័យខាងលើត្រូវបានឃាត់ខ្លួននៅអធិការដ្ឋាននគរបាលស្រុកគងពិសីដើម្បីកសាងសំណុំរឿងបញ្ជូនបន្តទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺចាត់ការតាមផ្លូវច្បាប់ ៕
