ខេត្តរតនគិរី៖ ទីតាំងបញ្ចាំម៉ូតូមួយកន្លែងក្នុងភូមិជ្រៃ សង្កាត់យក្សឡោម ក្រុងបានលុង ត្រូវបានប្រជាពលរដ្ លើកឡើងថា ទីតាំងដែលមានទទួលបញ្ចាំម៉ូតូចោរលួច ចោរប្លន់ ហើយស្ដុកទុកបានរាប់រាយគ្រឿង ប៉ុន្តែនៅពេល ដែលសមត្ថកិច្ចចុះពិនិត្យឆែកឆេរ បែរជារកឃើញម៉ូតូដាក់បញ្ចាំតែ៣គ្រឿង ដែលត្រូវបានអះអាងថា ជាម៉ូតូរបស់អ្នកលេងល្បែងចាញ់ ហើយបានខ្ចីលុយម្ចាស់ផ្ទះ ដោយទុកម៉ូតូសិន ពេលមានលុយសងទើបមកយកម៉ូតូទៅវិញ។ ហើយការឃាត់ខ្លួននេះ គ្រាន់តែយកទៅដល់បុស្ដិ៍បានមួយថ្ងៃ ចំណាយប្រាក់៧០ម៉ឺនរៀល សមត្ថកិច្ចក៏ដោះលែងឲ្យមកផ្ទះវិញ ។
ប្រតិបត្តិការណ៍ចុះពិនិត្យទីតាំងបញ្ចាំខាងលើ ត្រូវបានធ្វើឡើយកាលពីព្រឹក ថ្ងៃទី៨ ខែសីហា ឆ្នាំ២០១៥ ដែលមានកម្លាំងសមត្ថកិច្ចចម្រុះ៦០នាក់ បង្កឲ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋ និងម្ចាស់ផ្ទះ ប៉ុន្តែបែរជាមិនអនុញ្ញាតឲ្យអ្នកសារព័ត៌មានចូលរួម ដើម្បីផ្ដិតយករូបភាពទៅវិញ។ ប្រតិបត្តិការណ៍នេះ ដឹកនាំដោយលោកជា សុភ័ក្ដ្រ ព្រះរាជអាជ្ញារងអមសាលាដំបូងខេត្តរតនគិរី ដោយមានការសហការពីកន្លាំងអធិការដ្ឋាននគរបាលក្រុងបានលុង កម្លាំងបុស្ដិ៍នគរបាលរដ្ឋបាលឡាបានសៀក និងកម្លាំងបុស្ដិ៍នគរបាលរដ្ឋបាលបឹងកន្សែង ។
ប្រភពព័ត៌មានបានឲ្យដឹងថា ការចុះពិនិត្យនិងឆែកឆេរទីតាំងខាងលើ សមត្ថកិច្ចបានឃាត់ខ្លួនស្ដ្រីម្នាក់ឈ្មោះ ចែព្រលឹត អាយុ៤៥ឆ្នាំ ជាមេផ្ទះ ព្រមទាំងដកហូតបានម៉ូតូ៣គ្រឿងគឺ ទី១ ម៉ាកវេវអ៊ី ពណ៌ខ្មៅ ពាក់ស្លាកលេខភ្នំពេញ 1I 4855 ជាកម្មសិទ្ធិរបស់ឈ្មោះឈិន អូន រស់នៅក្នុងក្រុងបានលុង, ទី២ ម៉ាកស៊ុយហ្ស៊ុយគីស្មាស ពណ៌ក្រហម អត់ស្លាកលេខ ជាកម្មសិទ្ធិរបស់ឈ្មោះសាយ វិបុល រស់នៅក្នុងក្រុងបានលុង និងទី៣ ម៉ាកហុងដាឌ្រីម ស៊េរីឆ្នាំ២០១៥ ជាកម្មសិទ្ធិរបស់កូនមន្ដ្រីនគរបាលស្ថិតិនៃស្នងការដ្ឋាននគរបាលខេត្តរតនគិរី ដែលបានខ្ចីលុយស្ដ្រីខាងលើ៣០០ដុល្លារ ។
បើតាមសម្ដីរបស់ចែព្រលឹតដែលត្រូវជាម្ចាស់ផ្ទះខាងលើបានរៀបរាប់ឲ្យដឹងថា គាត់ពុំបានបើកអាជីវកម្មបញ្ចាំអីនោះទេ ប៉ុន្តែម៉ូតូដែលសមត្ថកិច្ចនគរបាលបានឃើញនៅពេលនេះ គឺជាម៉ូតូរបស់អ្នកស្គាល់គ្នា ដែលមានការខ្វះខាត និងអ្នកលេងល្បែងចាញ់ហើយត្រូវការលុយ មកខ្ចីគាត់ ដោយទុកម៉ូតូរបស់គេនៅផ្ទះគាត់សិន ចាំដល់ពេលមានលុយសងទើបមកយកម៉ូតូទៅវិញ។ គាត់ថា មិនដឹងជាមូលហេតុអ្វី នៅសុខៗស្រាប់តែមានសមត្ថកិច្ចនគរបាល នាំគ្នាមកយ៉ាងច្រើន ដើម្បីឡោមព័ទ្ធឆែកឆេរផ្ទះគាត់ ធ្វើឲ្យគាត់ភិតភ័យយ៉ាងខ្លាំង ។
ដោយឡែកប្រភពព័ត៌មានពីមន្ដ្រីនគរបាលម្នាក់បានឲ្យដឹងថា ដោយមានការរាយការណ៍ពីប្រជាពលរដ្ឋ ថាមានទីតាំងទទួលបញ្ចាំម៉ូតូខុសច្បាប់ ដែលជារបស់ចោរលួចនិងចោរប្លន់រាប់រយគ្រឿង ទើបមានការចេញដីកាឆែកឆេរផ្ទះខាងលើ ប៉ុន្តែ កម្លាំងរកមិនឃើញមានអ្វីគួរសង្ស័យក្រៅពីម៉ូតូទាំង៣គ្រឿងនេះទេ ។
គួរបញ្ជាក់ឲ្យដឹងដែរថា នៅក្នុងប្រតិបត្តិការខាងលើនេះ មានកម្លាំងសមត្ថកិច្ច៦០នាក់បានចូលរួមធ្វើការ ប្រៀបដូចជានាំគ្នាទៅធ្វើសឹកចម្បាំង ដែលធ្វើឲ្យមានការភិតភ័យយ៉ាងខ្លាំងដល់ប្រជាពលរដ្ឋក្នុងមូលដ្ឋាន។ ប៉ុន្តែកម្លាំងទាំងនោះ បែរជាមិនអនុញ្ញាតឲ្យក្រុមអ្នកសារព័ត៌មាន ចូលរួមដើម្បីផ្ដិតយករូបភាពនោះឡើយ ថែមទាំងប្រើពាក្យសម្ដីគម្រោះគម្រើយ ក្នុងន័យមើលស្រាលអ្នកសារព័ត៌មាន និងក្នុងបំណងលាក់លៀមប័ត៌មានថែមទៀតផង។ លើសពីនេះទៀត គេបែរសង្កេតឃើញមានមុខលោន ផន ទុំ ជានាយបុស្ដិ៍នគរបាលឡាបានសៀកបម្រុង ដែលពុំទាន់ពេញសិទ្ធិបានចេញមុខ បានចេញមុខក្នុងរឿងនោះ ដោយកាយវិការក្រអើតក្រទម និងបានប្រើប្រាស់ពាក្យសម្ដីមិនសមរម្យចំពោះអ្នកសារព័ត៌មានទៀត។ ចំពោះលោកនាយបុស្ដិ៍បម្រុងរូបនេះ កន្លងមក ធ្លាប់ត្រូវបានមន្ដ្រីក្រោមឱវាទ រួមទាំងលោកចៅសង្កាត់ឡាបានសៀក បាននាំគ្នាផ្ដិតមេដៃទម្លាក់ចោលម្ដងរួចទៅហើយកាលពីប៉ុន្មានខែកន្លងទៅ ដោយសារតែឫកពាមិនសមរម្យរបស់លោក ។
ប្រជាពលរដ្ឋបាននាំគ្នារអ៊ូរទាំថា នៅក្នុងភូមិសាស្ដ្រក្រុងបានលុង គេហាក់សង្កេតឃើញមានសំបូរដោយល្បែងស៊ីសងពាលាគ្រង់ប្រភេទ ដូចជាកន្ទុយលេខ បៀ ភ្នាល់បាល់ និងហ្គេមតាមអ៊ិនធឺណេត ដែលមានសកម្មភាពយ៉ាង គគ្រឹកគគ្រេងជុំវិញផ្សារបានលុង តែពុំឃើញមានស្ថាប័នណាចេញមុខបង្ក្រាបនោះឡើយ ។
បញ្ហានេះមានប្រភពមិនច្បាស់ការខ្លះបានលើកឡើងថា មូលហេតុដែលសមត្ថកិច្ចមិនចេញមុខបង្ក្រាបនេះ គឺដោយសារតែម្ចាស់ទីតាំងបនល្បែងទាំងនេះ មានសុទ្ធតែខ្នងបង្អែកធំៗ ដែលគេប្រើកូនចៅឲ្យដើរធ្វើសកម្មភាពយ៉ាងចំហរ គ្មានខ្លាចញញើតអ្វីនោះទេ។ ជាក់ស្ដែង ទីតាំងបញ្ចាំម៉ូតូខាងលើក៏កើតចេញមកពីអ្នកលេងល្បែងចាញ់ ហើយត្រូវការប្រាក់ស្រង់ដើមទើបយកម៉ូតូទៅបញ្ចាំបែបនេះ។ លើសពីនេះ ផលចោរកម្មមួយចំនួនដែលអ្នកលេងខ្វះលុយ បានលួចប្លន់ពីប្រជាពលរដ្ឋ ក៏បានយកទៅដាក់លក់បញ្ចាំនៅទីនោះដែរ តែសមត្ថកិច្ចបែរឆែកឆេររកមិនឃើញ ព្រោះតែភាពធ្វេសប្រហែសឆកល្វែង ដោយសារតែលុយ៧០ម៉ឺនបាំងមុខ ក៏ដោះលែងជនសង្ស័យទៅផ្ទះវិញ ។
ប្រជាពលរដ្ឋបានសំណូមពរដល់អាជ្ញាធរថ្នាក់លើ មេត្តាត្រួតពិនិត្យមើលបញ្ហាទាំងនេះឡើងវិញ ព្រោះថារាល់ថ្ងៃពួកគាត់ត្រូវរស់នៅដោយភាពភ័យខ្លាច ស្ទើររាល់ថ្ងៃ ណាមួយអំពើហិង្សាឈ្លោះទាស់ទែងក្នុងគ្រួសារព្រោះតែរឿងប្រាក់កាសចាញ់ល្បែង ណាមួយអ្នកឈ្នះនិងអ្នកចាញ់មើលមុខគ្នាមិនចំ និងសំខាន់នោះ គឺចោរកម្មគ្រប់ប្រភេទ ដែលកើតមាន បង្កផលប៉ះពាល់យ៉ាងខ្លាំងដល់សណ្ដាប់ធ្នាប់សង្គម ៕
ដោយ៖ អ៊ុច សាវុទ្ធ
