ភ្នំពេញ៖ យោងតាមរបាយការពីអគ្គនាយកដ្ឋានអន្តោប្រវេសន៍បានឲ្យដឹងថា នៅក្នុងអំឡុងឆ្នាំ២០១៤ ជនអន្តោប្រវេសន៍ខុសច្បាប់ ត្រូវបានសមត្ថកិច្ចបណ្តេញចេញពីព្រះរាជាណាចក្រកម្ពុជា សរុប ១៣០៧ នាក់ (ស្រី ២៧៧នាក់) មាន២៤សញ្ញាតិ ក្នុងនោះជនជាតិវៀតណាម ១០៥៩នាក់ (ស្រី ២៤៥នាក់) ។
ដោយឡែក ក្នុងឆ្នាំ២០១៥ គិតចាប់ពីថ្ងៃទី១ ខែមករា រហូតមកដល់ ថ្ងៃទី៣០ ខែកក្កដា បង្ក្រាបបានជនអន្តោប្រវេសន៍ខុសច្បាប់ សរុប ១៤៨៤នាក់ (ស្រី ១៧០នាក់) មាន៤២សញ្ញាតិ ក្នុងនោះជនជាតិវៀតណាម ១៣៣៨ នាក់ (ស្រី ១៦២នាក់) ។ សម្រាប់ខែកក្កដា ឆ្នាំ២០១៥ ជនអន្តោប្រវេសន៍ខុសច្បាប់ ត្រូវបានសមត្ថកិច្ចបណ្តេញចេញពីព្រះរាជាណាចក្រកម្ពុជា សរុប ២២២ នាក់ (ស្រី ៦២នាក់ ) មាន១៤សញ្ញាតិ ក្នុងនោះជនជាតិវៀតណាម ២០២នាក់ (ស្រី ៦១នាក់) ។
សូមបញ្ជាក់ថា នាវេលាម៉ោង ៩ និង៣០នាទី ព្រឹកថ្ងៃទី១៤ ខែសីហាឆ្នាំ២០១៥ នេះ អគ្គនាយកដ្ឋានអន្តោប្រវេសន៍ បានបណ្តេញជនជាតិវៀតណាមអន្តោប្រវេសន៍ខុសច្បាប់ចំនួន១៥នាក់ ក្នុងនោះស្រី២នាក់ អោយទៅស្រុកកំណើតវិញ ។
លោកឧត្តមសេនីយ៍ទោ អ៊ុក ហៃសិលា ប្រធាននាយកដ្ឋានអន្តោប្រវេសន៍ ក្រសួងមហាផ្ទៃប្រាប់អោយដឹងថា ជនជាតវៀតណាមទាំង១៥នាក់នេះ បង្ក្រាបបានពីខេត្តព្រះវិហារ ចំនួន ១៣ នាក់ (ស្រីម្នាក់) និងខេត្តសៀមរាប ២នាក់ (ប្រុសម្នាក់) ត្រូវដឹកបញ្ជូនចេញព្រះរាជណាចក្រកម្ពុជា តាមផ្លូវជាតិលេខ១ ច្រកបាវិត ខេត្តស្វាយរៀង ។
លោកឧត្តមសេនីយ៍ទោ អ៊ុក ហៃសិលា បានធ្វើការហាមប្រាមដល់ជនជាតិវៀតណាមទាំង១៥នាក់នោះ មិនត្រូវលួចឆ្លងដែនខុសច្បាប់នោះទេ ប៉ុន្តែបើបងប្អូនមានបំណងចង់មកលេងក្រុមគ្រួសារ ឬ បងប្អូននៅក្នុងព្រះរាជាណាចក្រកម្ពុជា គឺត្រូវមានប៉ាស្ព័រ និងវីសា ត្រឹមត្រូវ ហើយបើហួសសុពលភាព ត្រូវត្រឡប់ទៅស្រុកវិញភ្លាម មិនអាចជ្រកកោណដោយខុសច្បាប់បានឡើយ ៕
