ខេត្ដសៀមរាប៖ ប្រជាពលរដ្ឋបានឲ្យដឹងថា មានគ្រាប់បែកមួយគ្រាប់ ត្រូវបានជនមិនស្គាល់មុខ យកមកផ្លុងចោលនៅក្បែរកន្លែងលក់សំបុត្រ ឲ្យភ្ញៀវទេសចរណ៍អន្ដរជាតិ ចូលទស្សនាប្រាសាទអង្គរវត្ដ។ នៅម៉ោងប្រមាណជាង៦និង៣០នាទីព្រឹកថ្ងៃទី១៨ខែសីហានេះ ខណៈដែលភ្ញៀវទេសចរណ៍ចូលទស្សនាថ្ងៃរះ ។
សាក្សីដែលឃើញហេតុការណ៍ផ្ទាល់ បានអោយដឹងថា គ្រាប់បែកនោះមានទំហំប៉ុនកជើង និងនៅមានគុណភាពល្អ និងអាចមានគ្រោះថ្នាក់ដល់មនុស្ស ។ សាក្សីបានបន្ដទៀតថា គ្រាប់បែកនោះ ត្រូវបានជនមិនស្គាល់មុខផ្លុងចោលនៅវេលាយប់ ខណៈសមត្ថកិច្ចសន្និដ្ឋានថា គ្រប់បែកនោះអាចធ្លាក់ជ្រុះពេលមន្ដ្រីជំនាញដឹកជញ្ជូនចូលបន្ទាយទាហានវិស្វកម្មនៅក្បែនោះ។ទោះយ៉ាងណាសាក្សីបន្ថែមថា គ្រាប់មិនទាន់ផ្ទុះនោះ មិនមែនជ្រុះធ្លាក់ពីការដឹកជញ្ជូននោះទេ ព្រោះបើសិនធ្លាក់ អាចផ្ទុះឡើង ។
ទាក់ទងករណីនេះ លោក សត ណាឌី ស្នងការនគរបាលខេត្ដសៀមរាប បានមានប្រសាសន៍ថា គ្រាប់បែកនោះផលិតនៅប្រទេសសូវៀត ហើយបានធ្លាក់ជ្រុះពេលមន្រ្ដីជំនាញដឹកជញ្ជូនធ្លងកាត់តំបន់នោះ។ លោកបន្ដថា មជ្ឍមណ្ឌលកំចាត់មីន ស៊ីម៉ាក់ បានយកទៅរក្សាទុករួចរាល់ហើយ ៕
ដោយ៖ ជានិរន្ដរ៍
