អតីតប្រធានាធិបតីស្រីលង្កា លោក Mahinda Rajapakse បានថ្លែងប្រាប់ទីភ្នាក់ងារព័ត៌មាន AFP កាលពីថ្ងៃទី១៨ ខែសីហា ឆ្នាំ២០១៥ថា លោកព្រមទទួលយកការចាញ់នៅក្នុងការបោះឆ្នោតសភាលើកនេះ ។ ប៉ុន្តែទោះបីបែបណាក៏ដោយ លោកនឹងធ្វើជាបក្សប្រឆាំងនៅក្នុងសភាវិញ ។
អតីតប្រធានាធិបតីស្រីលង្ការូបនេះបានបញ្ជាក់ថា សុបិនរបស់ខ្ញុំដែលចង់ក្លាយជានាយករដ្ឋមន្ត្រីនោះ បានរសាត់ទៅឆ្ងាយបាត់ហើយ ។ ខ្ញុំសុខចិត្តព្រមទទួលយក ។ យើងបានចុះចាញនៅក្នុងការប្រកួតប្រជែងដ៏ល្អនេះ ។
លោក Rajapakse បានព្រមទទួលស្គាល់ថា គណបក្សសម្ពន្ធសេរីភាពប្រជាជនរបស់លោកបានដឹងខ្លួនហើយថា ចាញ់នៅក្នុងការបោះឆ្នោតនេះ មុនការប្រកាសរបស់លោក Mahinda Deshapriya ប្រធានគណៈកម្មាធិការជាតិរៀបចំការបោះឆ្នោតទៅទៀត។
លោកបន្តថា យើងបានទទួលសំឡេងគាំទ្រតែ៨ស្រុកប៉ុណ្ណោះ ចំណែកគណបក្សរួបរួមជាតិUNP វិញ ទទួលសំឡេងគាំទ្រ១១ស្រុក ក្នុងចំណោមសរុប២២ស្រុក ។ នេះមានន័យថា យើងបានចាញ់ហើយ ។ វាជាការលំបាកនៅក្នុងការប្រកួតប្រជែងយកឈ្នះណាស់ ។ មន្ត្រីបានលើកឡើងថា វាពិតជាពិបាកណាស់ដែរ ដែលគណបក្សអតីតប្រធានាធិបតីស្រីលង្កាទទួលបានសំឡេងគាំទ្រភាគច្រើនមកវិញនោះ ។
ចំណែកស្រុកដែលសល់៣ទៀតគឺបានទៅលើគណបក្សតាមិឡ ។ មន្ត្រីបានលើកឡើងថា គ្មានគណបក្សណាមួយទទួលបានសំឡេងគាំទ្រផ្តាច់គេ បានអាសនៈ១១៣ក្នុងសភា ដែលមានកៅអីសរុប២២៥អាសនៈនោះទេ នៅក្នុងការបោះឆ្នោតសកលដែលរៀបចំឡើងកាលពីថ្ងៃទី១៧ ខែសីហា ឆ្នាំ២០១៥នោះ ។
គណៈកម្មាធិការជាតិរៀបចំការបោះឆ្នោតនឹងចេញសេចក្តីប្រកាសចុងក្រោយនៅពាក់កណ្តាលថ្ងៃទីអង្គារ ខណៈដែលមនុស្សគ្រប់រូបកំពុងទន្ទឹងរង់ចាំសេចក្តីប្រកាសលទ្ធផលចុងក្រោយ ។ នៅមុនការបោះឆ្នោត គឺកាលពីថ្ងៃទី១៧ ខែសីហា លោក Rajapakse បានសម្តែងសុទិដ្ឋិនិយមថា លោកនឹងទទួលបានជ័យជម្នះក្លាយជានាយករដ្ឋមន្ត្រីស្រីលង្កាឡើងវិញ បន្ទាប់ពីតំណែងនេះលោកធ្លាប់បានធ្វើអស់រយៈពេលប៉ុន្មានខែដែរ ក្រោយពីលោកត្រូវបានទម្លាក់ពីតំណែងប្រធានាធិបតី ។
គណៈកម្មាធិការជាតិរៀបចំការបោះឆ្នោតបានបញ្ជាក់ថា ការបោះឆ្នោតត្រូវបានអំពាវនាវ និងគ្រោងធ្វើឡើងអស់រយៈមួយឆ្នាំ ដោយប្រធានាធិបតី Maithripala Sirisena ដែលជាអ្នកធ្វើរដ្ឋប្រហារទម្លាក់មេដឹកនាំជើងចាស់ស្រីលង្កាកាលពីខែមករា កន្លងមក ។ លោកជាបុគ្គលមួយរូបដែលមានអំណាចបំផុតក្នុងប្រវត្តិសាស្ត្រប្រទេសស្រីលង្កា ៕
ប្រែសម្រួល៖ ម៉ែវ សាធី
