ខេត្តព្រះវិហារ៖ ជនសង្ស័យជាឪពុកចុងម្នាក់ ត្រូវប្រពន្ធដែលត្រូវជាម្ដាយក្មេងស្រីរងគ្រោះប្ដឹងនគរបាលចាប់ខ្លួន បន្ទាប់ពី ជននោះបានចាប់រំលោភកូនដើម ហើយត្រូវគេតាមទាន់។ ការចាប់ខ្លួនជនសង្ស័យខាងលើ បានធ្វើឡើងកាលពីថ្ងៃទី១៨ ខែសីហា ឆ្នាំ២០១៥ ក្នុងភូមិឈូក ឃុំត្បែង២ ស្រុកគូលែន ខេត្តព្រះវិហារ ។
ប្រភពព័ត៌មានពីនគរបាលបានឲ្យដឹងថា ជនសង្ស័យដែលត្រូវបានឃាត់ខ្លួនឈ្មោះ ប៉ាន់ ពឿត អាយុ២៩ឆ្នាំ រស់នៅជាមួយប្រពន្ធ ក្នុងភូមិ-ឃុំកើតហេតុខាងលើ។ ចំណែកក្មេងស្រីរងគ្រោះឈ្មោះខ.ថ.ន រស់នៅជាមួយគ្នា ក្នុងភូមិ-កើតហេតុខាងលើ ។
តាមសម្ដីរបស់ស្រ្ដីជាម្ដាយក្មេងស្រីរងគ្រោះបានឲ្យដឹងថា បុរសខាងលើជាប្ដីក្រោយរបស់គាត់ ហើយតាំងពីរៀបការហើយមក គេមិនដែលជួយធ្វើការអីគាត់ទេ គឺគិតតែពីដើរផឹក។ ឯរូបគាត់វិញ មួយថ្ងៃៗដើរស៊ីឈ្នួលដកស្ទូងគេ រកតែពេលចូលផ្ទះមិនឃើញ ។
ស្រ្ដីដដែលបានបន្តថា នៅថ្ងៃកើតហេតុ ដោយសារមានការសង្ស័យនឹងប្ដីគម្រក់នេះ សាច់ញាតិគាត់បានតាមដានស្ងាត់ៗ ហើយក៏បានឃើញជននោះបានឲ្យលុយទៅកូនស្រីចំនួន១០០០រៀល ក៏បានល្បួងរំលោភបានសម្រេចតែម្ដង។ ពេលដែលសាច់ញាតិបានឃើញដូច្នេះ ក៏បានរត់ទៅប្រាប់គាត់ ទើបគាត់បានទៅប្ដឹងសមត្ថកិច្ចឲ្យចាប់ខ្លួនជននោះតែម្ដង ។
បន្ទាប់ពីត្រូវសមត្ថកិច្ចឃាត់ខ្លួន ជនសង្ស័យបានសារភាពថា ខ្លួនបានចាប់រំលោភក្មេងស្រីខាងលើ៤ដងរួចមកហើយទាំងលើកនេះ ហើយបានគំរាមមិនឲ្យនាងប្រាប់នរណាទេ ។
ក្រោយពីសាកសួរជនសង្ស័យរួចរាល់ សមត្ថកិច្ចបានកសាងសំណុំរឿងបញ្ជូនខ្លួនទៅកាន់តុលារ ដើម្បីចាត់ការបន្តតាមនីតិវិធី ៕
ដោយ៖ វិបុល
