ខេត្តត្បូងឃ្មុំ៖ ជនសង្ស័យចំនួន២នាក់ត្រូវបានកម្លាំងនគរបាលស្រុកពញាក្រែកចាប់ឃាត់ខ្លួនបានជាបន្តបន្ទាប់ខណៈពេលដែលឆក់ខ្សែកមាសទម្ងន់៤ជីពីប្រជាពលរដ្ឋម្នាក់ហើយព្យាយាមជិះម៉ូតូរត់គេចខ្លួនកាលពីវេលាម៉ោង១.និង១៥នាទីរសៀលថ្ងៃទី២៣កញ្ញា២០១៥ស្ថិតនៅចំណុចភូមិសុវណ្ណគមន៍ឃុំកណ្តោលជ្រុំស្រុកពញ្ញាក្រែកខេត្តត្បូងឃ្មុំ ។

មន្ត្រីនគរបាលព្រហ្មទណ្ឌស្រុកពញ្ញាក្រែកបានឲ្យដឹងថាជនសង្ស័យទាំង២នាក់ត្រូវបានជនរងគ្រោះសហការណ៍ជាមួយសមត្ថកិច្ចទើបរហូតឈានដល់ឃាត់ខ្លួនបានភ្លាមៗទី១ឈ្មោះ ជីវ វីឡា ភេទប្រុស អាយុ២៤ឆ្នាំ នៅភូមិអណ្តូងជ័យឃុំក្រែក ស្រុកពញាក្រែក ទី២ឈ្មោះញឹម សុភា ភេទប្រុស អាយុ៣១ឆ្នាំ រស់នៅភូមិនាងណយ ឃុំក្រែក ស្រុកពញាក្រែក។

សមត្ថកិច្ចបានបញ្ជាក់ឲ្យដឹងថាជនសង្ស័យទាំង២នាក់បានជិះម៉ូតូ១គ្រឿងម៉ាកC125ពណ៌ខ្មៅសេរីឆ្នាំ២០០៩បានធ្វើសកម្មភាពឆក់ផ្តាច់យកខ្សែកមាសទម្ងន់៤ជីពីស្ត្រីរងគ្រោះឈ្មោះវ៉ាស្រីពៅអាយុ៤០ឆ្នាំនៅភូមិស្ពានជ្រៃឃុំដូនតីហើយបានជិះម៉ូតូរត់គេចខ្លួនតែត្រូវកម្លាំងជំនាញតាមចាប់និងដកហូតបានវត្ថុតាងខ្សែកមាសប្រគល់ឲ្យទៅស្ត្រីរងគ្រោះវិញផងដែរ ។

នៅរសៀលថ្ងៃទី២៤កញ្ញានេះជនសង្ស័យទាំង២នាក់រួមនិងម៉ូតូ១គ្រឿងជាមធ្យោបាយធ្វើសកម្មភាពឆក់ត្រូវបានសមត្ថកិច្ចកសាងសំណុំរឿងតាមនិតិវិធីដើម្បីបញ្ជូនទៅសាលាដំបូងខេត្តត្បូងឃ្មុំ ៕

ដោយ៖ វណ្ណះ