ភ្នំពេញ៖ លោក អូស្មាន ហាស្សាន់ បានស្នើឲ្យគ្រូបង្រៀនឥស្លាម ទាំងអស់ ត្រូវគោរពក្រមសីលធម៌ និងបង្កើនវិជ្ជាជីវៈ ជៀសវាងកើតអំពើពុករលួយ ក្នុងសង្គម និយមបក្សពួក បញ្ហាទាំងអស់នេះសង្គម មិនត្រូវការនោះទេ វាកើតឲ្យមានការថ្នាំងថ្នាក់ ដល់សង្គមគ្រួសារ និងសហគមន៏របស់យើងថែមទៀតផង លោកអូស្មាន ហាស្សាន រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និង ជាប្រធានអង្គការមូលនិធិអភិវឌ្ឍន៍មុស្លិមកម្ពុជា បានស្នើសុំបែបនេះក្នុងខណៈដែល លោក ទទួលជួបសំណេះសំណាល ជាមួយថ្នាក់ដឹកនាំខ្មែរឥស្លាមទូទាំងប្រទេស ជាង១០០នាក់ នៅមណ្ឌលម៉ូឌែន៥រាជធានីភ្នំពេញ ក្នុងឱកាសពិធីបិទ សិក្ខាសាលា បណ្តុះបណ្តាលវិជ្ជាជីវៈអ៊ីមុាំ និងគ្រូ បង្រៀនឥស្លាមកម្ពុជា ដែលសិក្ខាសាលានេះទទួលបានការឧបត្ថម្ភគាំទ្រពីសំណាក់ អគ្គនាយកដ្ឋានអភិវឌ្ឍន៍ឥស្លាមម៉ាឡេស៊ី (JAKIM) និង សមាគមវិនិយោជិតសេវាកម្មសាសនាឥស្លាមម៉ាឡេស៊ី(PKPU) កាលពីថ្ងៃទី២៧ ខែកញ្ញា ឆ្នាំ ២០១៥ ។
លោក អូស្មាន ហស្សាន់ បានបញ្ជាក់ថា៖ វគ្គបណ្ដុះបណ្ដាល ដល់គ្រូបង្រៀនឥស្លាមជាង១០០នាក់នេះ មិនមែនជាលើកទីមួយនោះទេ មានច្រើនវគ្គ ណាស់ហើយ ដោយមានការឧបត្ថម្ភពី ភាគីម៉ាឡេស៊ី តាមរយៈអង្គការសមាគមនានា បានបើកវគ្គបណ្តុះបណ្តាលបង្កើនសមត្ថភាព ដល់គ្រួបង្រៀនបែបនេះ មកដល់សហគមន៍ឥស្លាមកម្ពុជា។ ដូច្នេះបងប្អូន ជាមន្ដ្រីបម្រើឲ្យវិស័យអប់រំ ជាថ្នាលបណ្ដុះធនធានមនុស្ស ឲ្យកូនចៅជំនាន់ក្រោយ ទទួលបានចំណេះដឹងខ្ពង់ខ្ពស់ ចូលរួមបម្រើជាតិមាតុភូមិឲ្យរីកចម្រើន ទៅថ្ងៃអនាគត ជាក់ស្តែងថ្ងៃនេះតាមរយៈ អគ្គនាយកដ្ឋានអភិវឌ្ឍន៍ឥស្លាមម៉ាឡេស៊ី (JAKIM) និង សមាគម វិនិយោជិតសេវាកម្មសាសនាឥស្លាមម៉ាឡេស៊ី(PKPU)បានផ្តល់នូវវគ្គបណ្តុះបណ្តាលនេះ វាពិតជាមានសារៈសំខាន់ណាស់ ក្នុងការរួមចំណែក ដើម្បីអភិវឌ្ឍន៍ វិស័យអប់រំឥស្លាមនៅកម្ពុជា ស្របពេលជាមួយគ្នាដែលថ្មីៗនេះ រាជរដ្ឋាភិបាល នៃព្រះរាជាណាចក្រកម្ពុជា ទើបតែបានសម្រេចបញ្ចូលគ្រូបង្រៀនឥស្លាមចំនួន១៥០០នាក់ ទៅក្នុងក្របខណ្ឌគ្រូបង្រៀន នៃក្រសួងអប់រំ យុវជន និងកីឡា។
លោកក៏ បានស្នើឲ្យគ្រូបង្រៀនឥស្លាមទាំងអស់ ត្រូវគោរពក្រមសីលធម៌ និងបង្កើនវិជ្ជាជីវៈ ជៀសវាងកើតអំពើពុករលួយ ក្នុងសង្គម និយមបក្សពួក បញ្ហាទាំងអស់នេះសង្គម មិនត្រូវការនោះទេ វាកើតឲ្យមានការ ថ្នាំងថ្នាក់ ដល់សង្គមគ្រួសារ និងសហគមន៏របស់យើងថែមទៀតផង ។ លោកបន្ថែមថា ៖ ទាំងនេះគឺដោយសារគោលនយោបាយដឹកនាំ ដ៏ត្រឹមត្រូវរបស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សេន ជាប្រមុខ ដែលសម្តេចបានផ្តល់នូវ សិទ្ធិសេរីភាពពេញលេញ សម្រាប់បងប្អូនឥស្លាមនៅកម្ពុជា និងបានបើកទូលាយនូវរាល់ ជំនួយមនុស្សធម៌ តាយរៈសម្បុរសជនជាតិ និងអន្តរជាតិ មកកម្ពុជា។ ក្នុងឱកាសនោះដែរ លោក អូស្មាន ហាស្សាន់ បានបញ្ជាក់ថា៖ ក្នុងនាមរាជរដ្ឋាភិបាលកម្ពុជា លោក សូមថ្លែងអំណរគុណ ចំពោះរាជរដ្ឋាភិបាលម៉ាឡេស៊ី ដែលតែងតែមានកញ្ចប់ថវិកា សម្រាប់ជួយឧត្ថម្ភគាំទ្រ ដល់សហគមន៍ឥស្លាមកម្ពុជា។ ក៏បានផ្តាំផ្ញើដល់សិក្ខាទាំងអស់ ត្រូវយកចំនេះដឹងដែលទទួលបាន ទៅចែករំលែកបន្ត ដើម្បីអភិវឌ្ឍន៍សហគមន៍របស់ខ្លួន មានការរីកចំរើនបន្តទៀត ៕
ដោយ៖ សំរិត
