នាយករដ្ឋមន្ត្រីអង់គ្លេស លោក ដេវីដ កាមរ៉ុន នឹងជួបពិភាក្សាទល់មុខគ្នាជាមួយប្រធានាធិបតីអ៊ីរ៉ង់ លោក ហាស្សាន់ រ៉ូហានី ពាក់ព័ន្ធដំណើរការស្វែងរកសន្តិភាពនៅក្នុងប្រទេសស៊ីរី ។
កិច្ចប្រជុំនេះគ្រោងធ្វើឡើងនៅទីក្រុងញូវយ៉កនាថ្ងៃទី២៩ ខែកញ្ញា ឆ្នាំ២០១៥ នៅពេលដែលភាគីទាំងបញ្ចប់ការចូលរួមកិច្ចប្រជុំកំពូលអង្គការសហប្រជាជាតិ ។
លោកនាយករដ្ឋមន្ត្រីអង់គ្លេស ដេវីដ កាមរ៉ុន បានសម្តែងក្តីសង្ឃឹមថា នឹងមានការគាំទ្របន្ថែមទៀតក្នុងផ្នែកនយោបាយក្នុងការស្វះស្វែងរកដំណោះស្រាយទៅលើជម្លោះប្រទេសស៊ីរី ។
ការប្រឹងប្រែងដើម្បីឲ្យទីក្រុងតេអេរ៉ង់ជំរុញឲ្យមានដំណើរការសន្តិភាពនៅក្នុងប្រទេសស៊ីរីនេះបន្ទាប់ពីរដ្ឋាភិបាលអ៊ីរ៉ង់បាននិងកំពុងមានទំនាក់ទំនងល្អជាមួយប្រទេសលោកខាងលិច ។
កាលពីខែមុននេះ ស្ថានទូតអង់គ្លេសប្រចាំនៅទីក្រុងតេអេរ៉ង់បានចាប់បើកដំណើរការឡើងវិញ ក្រោយពីក្រុមបាតុករបានឡោមព័ទ្ធនៅទីនោះ ហើយបានបិទទ្វារអស់រយៈពេល៤ឆ្នាំកន្លងមកនោះ ។
កាលពីខែកក្កដា ឆ្នាំ២០១៥ ទីក្រុងតេអេរ៉ង់បានឈានដល់ដល់កិច្ចព្រមព្រៀងជាមួយមហាអំណាចទាំង៦ដើម្បីផ្អាកកម្មវិធីអាវុធនុយក្លេអ៊ែររបស់ខ្លួន ថ្នូរនឹងការលើកលែងទណ្ឌកម្មសេដ្ឋកិច្ច ។
អ៊ីរ៉ង់ជាប្រទេសសម្ពន្ធមិត្តរបស់ប្រធានាធិបតីស៊ីរី លោកបាសា អាល់អាសាដ នៅអំឡុងឆ្នាំចុងក្រោយនេះ ។ ដោយមូលហេតុនេះហើយទើបបានជាមេដឹកនាំលោកខាងលិចខិតខំបញ្ចុះបញ្ចូលមេដឹកនាំអ៊ីរ៉ង់ដើម្បីជួយរកគន្លឹះពិភាក្សាបញ្ចប់សង្គ្រាមស៊ីវិលនៅក្នុងប្រទេសស៊ីរី ៕
ប្រែសម្រួល៖ ថាច់ យ៉ាត
